Հայաստանում Կnրnնավիրուսով պայմանավորված` համաճարակային իրավիճակը գնահատվում է կայուն:

Հաշվի առնելով իրավիճակային փոփոխությունը` առողջապահության նախարարությունը նախաձեռնել է սահմանափակումների մեղմացում:

Փակ տարածքներում դիմակ կրելու պարտադիր պահանջը հանվել է, բացառությամբ` բժշկական օգնություն և սպասարկում իրականացնող կազմակերպությունների: Այլ փակ տարածքներում խորհուրդ է տրվում կրել դիմակ՝ փոխելով այն 3-4 ժամը մեկ անգամ` ըստ անհրաժեշտության:

Փոփոխությունն ուժի մեջ է մտնում պաշտոնական հրապարակմանը հաջորդող օրվանից։

Նշենք, որ վերջին 14 օրվա ընթացքում արձանագրվել է հիվանդության 11775 դեպք, ինչը նախորդ նույն ժամանակահատվածի համեմատ (37459 դեպք) նվազել է 69%-ով: Թեստավորման դրական արդյունքների մասնաբաժինը վերջին 14 օրվա ընթացքում կազմել է 18.1%` նախորդ 37.9%-ի փոխարեն:

Հավելենք, որ սահմանափակումների վերաբերյալ առողջապահության նախարարության որոշումները բխում են համաճարակաբանական իրավիճակից և դրանով պայմանավորված` կրկին կարող են վերանայվել:

Գիշերը համեմատաբար հանգիստ է անցել, եթե կարող ենք այդպես ասել։ Այս մասին ArmDaily.am-ի հետ զրույցում ասաց Խարկովում ՀՀ հյուպատոսի օգնական Համլետ Հովհաննիսյանը։

Նա նշեց, որ մարդիկ աշխատում են հիմնականում ապաստարաններից դուրս չգալ, իրենց հետ նախապես մեծ քանակությամբ սնունդ ու անհրաժեշտ պարագաներ են վերցրել։

Հովհաննիսյանը նշեց, որ գիշերվան նախորդող օրը հզոր հարվածներ են հասցվել Խարկովին՝ քաղաքից գրեթե ոչինչ չի մնացել։ «Իրավիճակն անվերահսկելի վատ է, շատ վտանգավոր է ու կան մարդիկ, որ վախը սրտներում քաղաքից փորձում են դուրս գալ»,-ասաց Հովհաննիսյանը։

Նա նշեց, որ այնպիսի տպավորություն է, որ հիմա կռվում են բացառապես խաղաղ բնակչության դեմ։ Ինչ վերաբերում է այս պահին Խարկովում իրավիճակին՝ ՀՀ հյուպատոսի օգնականն ասաց, որ այս պահին խաղաղ է։ «Եթե լռություն է լինում, կարողանում ենք դուրս գալ, բարձրանալ տուն, բայց շատ կարճ ժամանակով։ Սնունդի խնդիր շատ-շատ մարդիկ ունեն, ովքեր մայրերի, երեխաների հետ, հիվանդների հետ են, չեն կարողանում դուրս գալ, ո՞վ պետք է իրենց սնունդ բերի, սննդի խնդիրը շատ սուղ է։ Թիրախն էլ հիմնականում բնակելի տներն են՝ տեսել ենք, թե գիշերն ինչ է կատարվել։ Թիրախում բնակելի շենքերն են, լիքը զոհեր, Խարկովն ուղղակի ավիրել են, բնակելի մի քանի շենքեր գիշերը խփել են»,- տեղեկացրեց ՀՀ հյուպատոսի օգնականը։

ArmDaily.am

Ուկրաինական լրատվամիջոցների փոխանցման համաձայն, երկու հրթիռ է հարվածել Կիեւի հեռուստաաշտարակին։

Ուկրաինայի Գերագույն Ռադայում հայտարարել են, որ Կիեւի հեռուստաաշտարակի հրթիռակոծումից հետո հեռարձակման հետ կապված կան խնդիրներ եւ միացվելու է ռեզերվային հեռարձակումը։

Այսօր կպատմենք մի երկրի մասին, որտեղ կյանքը ուտոպիայի է նման։

Այս երկիրը Իսլանդիա է կոչվում։ Այն այնքան հայտնի չէ, որքան շատ ուրիշ պետություններ, սակայն այն ավելի լուրջ ուշադրության է արժանի և ահա թե ինչու։

Իսլանդիան 332529 բնակչություն ունի։ Այստեղ բոլորն իրար գիտեն, այդ պատճառով էլ տնից դուրս գալիս դուռը կողպելու կարիք չկա, կամ մեքենայի բանալին հանելու։ Այստեղ երեխաներին սայլակով հանգիստ թողնում են խանութի մոտ և ներս մտնում։

Նախկին սիրահարները բաժանվելուց հետո լավ ընկերներ են մնում, քանի որ իրենց բոլոր ընկերներն ընդհանուր են։ Իսլանդիայում չկա «Մակդոնալդս» արագ սննդի ոչ մի ռեստորան. դրանցից վերջինը փակվել է 2008 թվականին։

Իսլանդացիները շատ են սիրում կարդալ և համարվում են աշխարհի ամենակարդացող ժողովուրդը։

Այստեղ աշխատանքի ընդունվելիս երաշխավորագիր նախկին գործատուից չի պահանջվում, քանի որ այստեղ մարդիկ իրար հավատում են և երբեք չեն ստուգի նշված տեղեկատվությունը։

Իսլանդիան աշխարհում միակ երկիրն է, որտեղ մարդիկ առցանց ռեժիմով են քվեարկում։

Այս երկիրը շատ պահպանողական է համարվում. տեղի բնակիչներն այստեղ շատ լուրջ են վերաբերվում ամուսնությանն ու ընտանեկան ավանդույթներին։ Միևնույն ժամանակ, սակայն, նրանք հանդուրժող և հարգալից են միմյանց նկատմամբ, այդ պատճառով էլ միասեռ ամուսնությունների օրինականացումն այստեղ շատ հանգիստ ընդունվեց։

Իսլանդիայում չկա բանակ։ Եթե քաղաքացիներից ինչ որ մեկն ուզում է ծառայել բանակում, նա կարող է միանալ Նորվեգիայի բանակին՝ երկու երկրների միջև պայմանագրի շրջանակներում։

Բոլոր դպրոցներն ու մյուս կրթական հաստատություններն այստեղ անվճար են։

Իսլանդիայում չկան մասնավոր հիվանդանոցներ, քանի որ չկա դրա անհրաժեշտությունը։ Պետական հիվանդանոցները բնակչությանն անվճար բարձրակարգ բժշկական ծառայություն են մատուցում։

Այս երկրում կենտրոնացված ջեռուցման համակարգ է օգտագործվում, բայց կարևորն այն է, որ այն բնակիչներին անվճար է տրամադրվում։

Ամեն տարի Իսլանդիան հայտնվում է ամենաբարձր կենսամակարդակով երկրների տասնյակում։

Ահա այսպիսի փոքրիկ և զարմանահրաշ երկիր է Իսլանդիան։

ՀՀ Փաստաբանների պալատը հայտարարություն է տարածել, որը ներկայացնում ենք ստորև․

Կանանց միջազգային օրվան ընդառաջ ՀՀ փաստաբանների պալատը հայտարարում է 2022թ. մարտի 10-ին և 11-ին հանրապետության ամբողջ տարածքում կանանց իրավունքներին նվիրված միջոցառում իրականացնելու մասին:

Միջոցառման շրջանակներում փաստաբանական գրասենյակները և փաստաբանները անվճար իրավաբանական խորհրդատվություն կտրամադրեն կանանց:

Նախաձեռնության գլխավոր նպատակն է խթանել կանանց իրավունքների պաշտպանությունը Հայաստանում, ինչպես նաև բարձրացնել հանրային իրավագիտակցությունը և փաստաբանին դիմելու իրավական մշակույթը:

Միջոցառմանն արդեն իսկ միացել են ավելի քան հինգ տասնյակ փաստաբաններ և երեք տասնյակ փաստաբանական գրասենյակներ իրենց թիմերով, ինչպես նաև «Փաստաբանական դպրոց»-ը:

Անվճար իրավաբանական օգնությունը տրամադրվելու է ինչպես ՀՀ փաստաբանների պալատի Երևան քաղաքում տեղակայված վարչական շենքում, այնպես էլ փաստաբանական գրասենյակներում՝ Երևանում և բոլոր մարզերում:

Հարգելի՛ գործընկերներ, Փաստաբանների պալատը նախատեսում է միջոցառման վերաբերյալ իրականացնել հանրային լայն իրազեկում և ակնկալում է այդ առումով բոլոր շահագրգիռ կողմերի աջակցությունը: Միջոցառումը բաց է լուսաբանման համար:

Լրացուցիչ մանրամասների և հետաքրքրող հարցերի առնչությամբ կարող եք կապ հաստատել ՀՀ փաստաբանների պալատի մամուլի խոսնակ Սիլվի Տիգրանյանի հետ (հեռ.՝ 077 96 06 37) :

ՀՀ Փաստաբանների պալատ

Գազի սակագինն ապրելի 1-ից սովորական սպառողների համար կբարձրանա 4․7 դրամով՝ դառնալով 143.7 դրամ․ Հանրային ծառայությունները կարգավորող հանձնաժողովն (ՀԾԿՀ) այսօր բավարարեց «Գազպրոմ Արմենիայի» հայտը, սակայն ՀԾԿՀ-ի արած առաջարկների հիման վրա․ ռուսական ընկերությունն առաջարկում էր կապույտ վառելիքի միասնական սակագին սահմանել 135.6 դրամ, կարգավորող հանձնաժողովն էլ հայտն ուսումնասիրելուց հետո իր հաշվարկներն էր ներկայացրել՝ առաջարկելով անապահով խավերի համար սակագինն անփոփոխ թողնել՝ 100 դրամ, սովորոկան սպառողների համար գազը թանկացնել 4.7 դրամով՝ սահմանելով 143.7 դրամ։

Մեծ ծավալի՝ ամսական 10 հազար խորանարդ մետրից շատ գազ սպառողների, այսինքն՝ բիզնեսի համար, ՀԾԿՀ-ն շուրջ 4 տոկոս թանկացում էր նախատեսում, ավելի քան 4 տոկոս թանկացում էլ ջերմոցային տնտեսությունների համար։

Փաստորեն գազը միջինը 4.1 տոկոսով կթանկանա, ռուսական ընկերությունը, մինչդեռ 6 տոկոս թանկացում էր նախատեսում ու միասնական սակագնի սահմանում։

ՀՀ հանրային ծառայությունները կարգավորող հանձնաժողովը որոշեց «Գազպրոմ Արմենիա» ՓԲԸ-ի կողմից սպառողներին վաճառվող բնական գազի համար սահմանել հետևյալ սակագները.

1) ՀՀ կառավարության 2016 թվականի նոյեմբերի 3-ի №1122-Ն որոշման համաձայն սոցիալապես անապահով ընտանիքների սպառողներին վաճառվող բնական գազի սակագինը՝ տարեկան մինչև 600 խորանարդ մետր բնական գազի համար՝ 100000 դրամ/հազար խմ (ներառյալ ԱԱՀ-ն),

2) Բնակչությանը (բացառությամբ սոցիալապես անապահով սպառողների՝ տարեկան մինչև 600 խմ բնական գազի համար) վաճառվող բնական գազի համար՝ 143700 դրամ/հազար խմ (ներառյալ ԱԱՀ-ն),

3) գյուղատնտեսության ոլորտում գործունեություն իրականացնող ջերմոցային տնտեսություններին վաճառվող բնական գազի սակագինը` նոյեմբերի 1-ից մինչև մարտի 31-ը ներառյալ ժամանակահատվածի համար՝ 233.9 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար (ներառյալ ԱԱՀ-ն),

4) գյուղատնտեսության ոլորտում գործունեություն իրականացնող վերամշակող՝ պահածոների, խմիչքների և կաթնամթերքի արտադրությամբ զբաղվող, անձանց վաճառվող բնական գազի սակագինը` 233.9 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար (ներառյալ ԱԱՀ-ն),

5) վերը նշված 1-4-րդ կետերով չնախատեսված մյուս սպառողներին (այդ թվում՝ ջերմային էլեկտրակայաններին) վաճառվող բնական գազի սակագինը՝ յուրաքանչյուր ամսում մինչև 10 հազար խորանարդ մետր բնական գազի համար՝ 143700 դրամ/հազար խմ (ներառյալ ԱԱՀ-ն) և 10 հազար խորանարդ մետրը գերազանցող բնական գազի համար՝ 265.81 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար (ներառյալ ԱԱՀ-ն)։

Սահմանված սակագներն ուժի մեջ կմտնեն 2022 թվականի ապրիլի 1-ից:

44-օրյա պատերազմում միակ որդուն կորցրած 60-ամյա զույգը ծնողներ են դարձել:
«Շենգավիթ» ԲԿ֊ում հաճելի իրարանցում է՝ 44֊օրյա պատերազմում զոհված Գարիկ Դավթյանի եղբայրն է ծնվել․ Մոր խոսքերով իսկը Գարիկի փոքրությունն է, Գարիկի պես էլ լավ ու բարի մարդ է մեծանալու:

Սա յուրահատուկ իրադարձություն է, քանի որ հերոոսի ծնողները՝ Գևորգ և Գոհար Դավթյանները, 24 տարի անց՝ 60 տարեկան հասակում, որոշեցին կրկին ծնողներ դառնալ և դիմելով «Շենգավիթ» ԲԿ֊ի ռեպրոդուկտոլոգ Աննա Խաչատրյանին( Dr. Anna Khachatryan/գինեկոլոգ-ռեպրոդուկտոլոգ ) , կատարեցին այդ երազանքը փոխնակ մոր օգնությամբ:
Փոքրիկին եղբոր անունով են անվանակոչել, հայրը պատմում է՝ այլ անուն էր ուզում տալ որդուն, բայց մայրը պնդել է՝ թող իրենց Գարիկը կրկին տանը լինի.

Ամուսինները հուզմունքը չեն կարողանում թաքցնել, մայրը պատմում է՝ բալիկի ծնունդից առաջ շատ անհանգիստ է եղել, հետո երազ է տեսել, ու հասկացել՝ վախենալ պետք չէ՝ Աստված ու հերոս Գարիկն այնպես կանեն, որ ամեն ինչ բարեհաջող կընթան:

Հայրիկի խոսքով՝ ամեն ջանք կներդնեն, որ նորածին որդին անհոգ մեծանա, Գևորգ Դավթյանը վստահեցնում է՝ փոքրիկն իրենց ընտանիքի հույսն ու հավատն է լինելու.

Տիկին Գոհարը չի թացնում՝ կարոտել է, երբ իրեն մայրիկ էր ասում որդին, փոքրիկ Գարիկը կօգնի նորից զգալ այդ բերկրանք:

Վերջին 1,5 տարին կորցրած որդու կարոտից քուն չի ունեցել, այսուհետ պատրաստ է կրկին անքուն գիշերներ անցկացնել, միայն թե արդեն նորածին Գարիկի կողքին լինելու համար:

Հասուն հղիությունից ծնված փոքրիկը ծնվել է 3,450 կգ․ քաշով և 51սմ․ հասակով, նրա ծնունդն ընդունել է «Շենգավիթ» բժշկական կենտրոնի գլխավոր տնօրենի՝ ծննդօգնության գծով տեղակալ, մանկաբարձական բաժնի ղեկավար Աշոտ Սիրունյանը: Հերոսի եղբայրն իրեն հրաշալի է զգում և պատրաստվում է տուն գնալ:

Ծնվելուց հետո փոքրիկ Գարիկը գտնվել է Նորածնային և անհաս երեխաների ինտենսիվ թերապիայի և վերակենդանացման բաժանմունքում՝ ղեկավար Հակոբ Մելքումյանի և նեոնատոլոգ Նազելի Սանոսյանի հսկողության ներքո:
Նազելի Սանոսյանը Գարիկի առաջին բժիշկն է, ինչպես նա է ասում՝ աչքերը բացել ու իրեն է տեսել:

Կլինիկայի ողջ բուժանձնակազմը յուրահատուկ պատասխանատվությամբ ու հուզմունքով են հոգ տանում փոքրիկի մասին

Աղբյուրը՝ Շենգավիթ ԲԿ

ՀՀ Լոռու մարզի Թեղուտ բնակավայրում սոցիալական բևեռացումը խորանում է: Թեղուտ բնակավայրի մի շարք բնակիչներ բարձրաձայնում են սոցիալական, բնապահպանական և առողջապահական  խնդիրների խորացման մասին:

2022թ․ փետրվարի 28-ին «Քաղաքացու ձայնը» մեդիա-հարթակի «Քաղաքացու ձայնը» հարղորդաշարի եթերում տեղի ունեցավ Թեղուտ բնակավայրի բնակիչներ Մարտին Շախկյանի, Մհեր Մելքոնյանի, Կամո Հոբոսյանի, Արմեն Մկրտումյանի և իրավապաշտպան, «Համայնքային համախմբման և աջակցության կենտրոն» ՀԿ-ի նախագահ Օլեգ Դուլգարյանի մամուլի ասուլիսը…

… Օլեգ Դուլգարյանը նշեց, որ պետք է լրջորեն ուսումնասիրվի շրջակա միջավայրի աղտոտվածության և մարդկանց առողջության վատթարացման պատճառահետևանքային կապը: «Մինչդեռ ընկերությունները կասկածի տակ են առնում հետազոտության արդյունքները: Ազդակը կա, թող ապացուցեն, որ այդպես չէ: Ոչ թե քաղաքացին ապացուցի, այլ ընկերությունը, որ տվյալ վնասը չի տալիս: Բոլոր համայնքերում բնապահպանական, սոցիալական և առողջական խնդիրներ կան: Հնարավոր չէ այդ համայնքում ունենալ բնապահպանական խնդիր և չունենալ առողջական խնդիր և՝ հակառակը»,- նշեց նա:

Խոսելով բնակավայրում այլընտրանքային ծրագրերի ներդրման մասին՝ Օլեգ Դուլգարյանը նշեց, որ անհրաժեշտ է տարբեր ֆոկուս խմբերի շրջանում հարցումներ անցկացնել. «Երիտասարդների, կանանց, տղամարդկանց հետ առանձին խոսել, կարծիքներ դուրս գրել: Պետք է քննարկել, թե ինչ ստեղծել գյուղում, որպեսզի մարդիկ աշխատեն, իսկ երբ ընկերությունը հանքի պաշարները սպառի, գնա, ինչով կարող է գյուղը հետագայում զարգանալ: Եվ հանդիպումները իրականացնել հանրային քննարկումների ձևաչափով, որպեսզի բոլոր շահագրգիռ մարդիկ մասնակցեն»,- նշեց նա:

Օլեգ Դուլգարյանը նաև շեշտեց, որ պետությունն էլ իր հերթին պետք է կոնկրետ այնպիսի ծրագրեր հաստատի բնակավայրում, որոնք իրենց մեջ ներառում են սոցիալ-տնտեսական այլընտրանքային զարգացման բաղադրիչներ, որպեսզի դրանք իրապես նպաստեն բնակավայրի սոցիալ-տնտեսական զարգացմանը:

նյութն ամբողջությամբ, Աղբյուր` https://www.ecolur.org/