Տրանսպորտային միջոցների գազաբալոններ տեղադրող և սպասարկող առաջին 5 կազմակերպությունները վկայագրեր ստացան․ դրանցից երկուսը գործելու են Երևանում, երկուսը Շիրակում, մեկը՝ Լոռիում։ Եվս 3 ընկերություն դիմել են Տարածքային և ենթակառուցվածքների նախարարություն՝ լիցենզիա ստանալու համար։
Այս ընկերությունները վկայագրեր կտրամադրեն իրենց մոտ ստուգաչափում անցած մեթանով և պրոպանով շահագործվող գազաբալոններ ունեցող տրանսպորտային միջոցներին։ Օգոստոսի մեկից, առանց այդ վկայագրերի գազալցակայանները իրավունք չեն ունենա լիցքավորել գազաբալոնները։
Կառավարության նոր որոշումն է՝ անվտանգության նկատառումներից ելնելով՝ 2 տարին մեկ պետք է ստուգաչափվեն պլաստմասե փաթույթով, իսկ 3 տարին մեկ՝ մետաղական բալոնները։ Փետրվարի 18-ին գազաբալոնների տեղադրման և ստուգաչափման լիցենզիա ստացած 5 ընկերություններից մեկն էլ գտնվում է Լոռու մարզի Սպիտակ քաղաքում․ լաբորատորիայի տեղակայման համար էլ հատուկ չափանիշներ կան։ Վարորդները կարևորում են գազաբալոնների ստուգաչափման գործընթացը, բայց խնդիրներ են տեսնում։
Ողջ մարզում գործելու է գազաբալոնների տեղադրման և սպասարկման միայն մեկ կայան․ և, ինչպես հայտնի է, յուրաքանչյուր բալոնի ստուգաչափման համար 1-1,5 ժամ է անհրաժեշտ։ Սպարտակ Այվազյանն այս գործով զբաղվում է արդեն 17 տարի։ Ընկերությունում ամեն տարի փորձաքննություն է իրականացվում, մասնագետների համար էլ 3 ամիսը մեկ հենց ինքն է վերապատրաստումներ անցկացնում։ Վարորդները գազաբալոնների լիցքավորման վկայագրեր ստանալու համար մինչև օգոստոսի 1-ը ժամանակ ունեն։
Դրանից հետո գազալցակայանները կհրաժարվեն վկայագրեր չունեցող մեքենաները լիցքավորել, քանի որ գործելու են միասնական շտեմարաններ, որոնք հասանելի են լինելու նաև պարեկային ծառայություններին ու ՃՈ-ին։ Նարինե Մաթևոսյան, ՄԻԳ ՀՌԸ
Սպիտակ տունը հինգշաբթի հայտարարել է, որ մտադիր է Կոնգրեսից ավելի քան 32 մլրդ դոլար խնդրել՝ Ռուսաստանի դեմ պայքարում Ուկրաինային օգնելու եւ kovid համավարակի դեմ ձեռնարկվող լրացուցիչ միջոցառումների համար, հայտնում է «Ամերիկայի ձայնը»:
Այդ գումարից Բայդենի վարչակազմը 10 մլրդ դոլար կհատկացնի Ուկրաինային ռազմական եւ հումանիտար օգնության համար։ 22,5 մլրդ դոլար կծախսվի COVID-19-ի վերացման եւ կանխարգելման համար։
Ինչպես նշվում է Սպիտակ տան Վարչաբյուջետային բաժնի տնօրենի ժամանակավոր պաշտոնակատար Շալանդա Յանգի հայտարարության մեջ, առաջարկվող հատկացումը պետք է լինի ԱՄՆ կառավարության ֆինանսավորման բյուջետային օրինագծի մի մասը, որը նախատեսվում է մինչեւ մարտի 11-ն ընդունել:
«Մենք Կոնգրեսին կոչ ենք անում ժամանակին տրամադրել 22,5 միլիարդ դոլար՝ [բժշկական] թեստերի, բուժման եւ պատվաստանյութերի, հաջորդ սերնդի պատվաստանյութերի հետազոտության մեջ ներդրումների եւ գլոբալ ծրագրերի համար, եւ ամբողջ աշխարհում ավելի շատ պատվաստումներ իրականացնելու այսօր արդեն անհրաժեշտ ծախսերը հոգալու համար»,- ասվում է փաստաթղթում։
Յանգը նաեւ ընդգծել է Ուկրաինային եւ Կենտրոնական Եվրոպայում ԱՄՆ-ի դաշնակիցներին օգնելու հրատապ անհրաժեշտությունը՝ Ուկրաինա ռուսական ներխուժման պայմաններում:
Նա պարզաբանել է, որ այդ միջոցները կօգտագործվեն ուկրաինացի զինվորականներին մարզելու, ուկրաինական էներգամատակարարման համակարգը պաշտպանելու, կիբեռպաշտպանության ամրապնդման եւ Կրեմլի դեմ լրացուցիչ պատժամիջոցների համար։
