Լոռու մարզը կունենա զբոսաշրջության զարգացման ռազմավարական ծրագիր

 Ծրագրի նպատակն է օգնել ՏԻՄ-երին հասկանալու համայնքների ուժեղ և թույլ կողմերը, հնարավորությունները տուրիզմը համայնքներում զարգացնելու համար։

Ստեղծված ուղեցույցը ներկայացնելու համար հրավիրվել էր քննարկում, որին ներկա էին Լոռու մարզպետի տեղակալ Գոռ Ասրյանը, Լոռու մարզպետարանի զարգացման ծրագրերի, վերլուծության և զբոսաշրջության բաժնի պետ Հասմիկ Մկրտչյանը, ոլորտի մասնագետներ, ՏԻՄ և ՀԿ ներկայացուցիչներ և ոլորտում ակտիվ գործունեություն ծավալող անձինք։

Ծրագրի արդյունքները շահագրգիռ կողմերին ներկայացրեցին Համայնքների ֆինանսիստների միավորում ՀԿ-ի փոխնախագահ Աբրահամ Արտաշեսյանը, Հայաստանի Ամերիկյան համալսարանի զբոսաշրջության մագիստրոսի սերտիֆիկատի ծրագրի ղեկավար Զառա Զեյթունցյանը և զբոսաշրջության փորձագետ Սամվել Վանյանը։

Ռազմավարական առաջարկը ներառում է ինստիտուցիոնալ և կլաստերային զբոսաշրջության զարգացումը, ուղեցույցում Լոռու մարզը պայմանականորեն բաժանված է 3 կլաստերի։ Զբոսաշրջության առաջխաղաման համար մարզում, որպես ամենաշատ հնարավորություններ ունեցող համայնքներ, մասնագետներն առաջինը դիտարկում են Թումանյանի տարածաշրջանը, որին հաջորդում են Վանաձորը շրջակա համայնքներով, ապա Ստեփանավան-Տաշիր ուղղությունը։

Ըստ փորձագետների՝ Թումանյանի տարածաշրջանն ունի զբոսաշրջային լուրջ ենթակառուցվածքներ, անհրաժեշտ է միայն ճիշտ բերնդավորել և առաջխաղացման միջոցառումներ ձեռնարկել։ Մասնագետները վստահ են, որ Թումանյանը հնարավորություններ ունի որպես նյութական և ոչ նյութական մշակութային ժառանգության կենտրոն ներկայանալու և կարող է նոր ու կայուն զբոսաշրջիկների հոսք բերել։

— Մեր խնդիրն է մարզը դարձնել զբոսաշրջիկների համար ավելի գրավիչ։ Վերջին տարիներին իրականացվել են համայնքային ենթակառուցվածքների, ճանապարհների բարեկարգման աշխատանքներ, հուշարձանների պահպանման, այգիների կառուցման և այլն, որոնք կնպաստեն տուրիզմի զարգացմանը մեր մարզում։

Տեղական, մասնավոր և միջազգային կազմակերպությունների օժանդակությամբ բազմաբնույթ ներդրումներ են իրականացվել մարզում։ 2021 թ․ Լոռու մարզում ներդումների քանակը կազմել է 800 միլիոն դրամ։ Մենք բաց ենք համագործակցության համար և ողջունում ենք Եվրոպական միության հերթական հաջողված ծրագրի իրականացումը մեր մարզում,- ասաց Լոռու մարզպետի տեղական Գոռ Ասրյանը։

Առաջարկի հիման վրա մարզը կկազմի զբոսաշրջության զարգացման ռազմավարական պլան և գործողությունների ծրագիր։