ՀՀ Լոռու մարզի առաջին ատյանի ընդհանուր իրավասության դատարանի Ալավերդի նստավայրում դեկտեմբերի 7-ին շարունակվում էր Ա. Եսայանի քրեական գործի քննությունը: Ա. Եսայանը «Էյ-ի-Ջի սերվիս» ՍՊԸ-ի Լոռու ԳՀՏՍ ծառայության Ալավերդու տեղամասի փականագործն է: Նա իրականացնում է տնայցեր, ստուգում, որ բնակիչները հետևեն գազասպառման կանոններին: Ա. Եսայանին մեղադրանք է առաջադրվել իր աշխատանքը պատշաճ չիրականացնելու համար, որի արդյունքում մի աբողջ ընտանիքի մահ է գրանցվել: Հիշեցնենք, որ  2019թ․ նոյեմբերին Ալավերդի քաղաքի բնակիչներ Յուրա, Սուրեն, Դիանա Իսրայելյանները և Գայանե Ալեքսանյանը ածխածնի մոնօքսիդի (շմոլ գազ) բարձր քանակությունից թունավորվել էին և մահացել։ Մանրամասներն այստեղ՝ https://narlur.blogspot.com/2021/08/blog-post_12.html?fbclid=IwAR0xH_sc4PeetSDa79qoaXRG_2wn1yPTFFP_vfy7TMzWvuz34yJdhXQ28BE

Դեկտեմբերի 7-ին կայացած դատական նիստը՝ գործի հարցաքննության փուլն էր։
Տուժողի իրավահաջորդ Սոֆիկ Ալեքսանյանը մահացածներից Գայանե Ալեքսանյանի մայրն է: Նա հարցաքննության սկզբում նշեց, որ ինքը Ա. Եսայանին մեղավոր չի ճանաչում, գտնում է, որ  աղջկա և ամուսնու անփութությունն է եղել ողբերգական դեպքի պատճառը: Նա պատմեց, որ դեպքից որոշ ժամանակ առաջ աղջկա բնակարանում վերանորոգման աշխատանքներ և որոշ ձևափոխություններ են իրականացրել: Նշեց,  որ հին գազօջախն էլ փոխարինել էին նորով:

Ամբաստանյալի շահերի պաշտպան Ռոման Կոնինյանը հարցադրումների միջոցով փորձեց պարզել, թե որտեղ է գտնվել ջրատաքացուցիչը բնակարանը ձևափոխելուց հետո և որքան ժամանակ է ընդհանրապես օգտագործվել  այն:
Վկան նշեց, որ արդեն լավ չի հիշում, այդ շրջանում բազմաթիվ ձևափոխություններ են կատարվել, սակայն մտաբերեց, որ ջրատաքացուցիչը և գազօջախը գտնվել են խոհանոցում՝ իրար մոտ:
Նախագահող դատավորը ևս փորձեց պարզել, թե ջրատաքացուցիչը վկայի աղջկա տանն ինչքան ժամանակ է օգտագործվել: Վկան մտաբերեց, որ սեպտեմբեր ամսին իր աղջկա հետ ձմռան համար պահածոներ են պատրաստել և այդ ժամանակ օգտագործել են տաք ջուր:

Գործում ներգրավված մյուս վկան  Լուսինե Ալեքսանյանն է: Նա ողբերգական դեպքի արդյունքում մահացած Գայանե Ալեքսանյանի զարմուհին է: Ամբաստանյալ՝ Ա. Եսայանը գազի ներտնային սպասարկում է իրականացնում նաև Լուսինե Ալեքսանյանի բնակարանում: Վկան պատմում է, որ իր ուսանողության 2 տարիներին բնակվել է հորաքրոջ տանը և ավարտելուց հետո շփումը միմյանց հետ միշտ ջերմ է եղել, միմյանց այցելությունները՝ հաճախակի: Հիշում է, որ դեպքի առավոտյան  Գայանե Ալեքսանյանի աշխատավայրից զանգ է ստացել, որ վերջինս չի ներկայացել աշխատանքի, անհանգստացել է, գնացել է տուժողի տուն և հայտնաբերել է վերջիններիս մահացած: Նշեց որ տունը անտանելի շոգ էր, միանգամից հասկացել է,  որ գազի հետ կապված խնդիր է եղել, բացել է լուսամուտը: Այդ ժամանակ բաց է եղել նաև ջրի ծորակը, նշեց որ ջուրը սառն էր: Վկան նշում է, որ ջրատաքացուցիչ տուժողի տանը եղել է 2013թ․-ից հետո, որոշ ժամանակ օգտագործելուց հետո այն խափանվել է  և ուղղակի դրված է եղել միջանցքում, հատակի վրա: Կենցաղային հարցերը լուծել են ջուրը տաքացնելով: Վկան նշեց, որ 2019 թվականին, երբ տեղափոխվել է իր նոր բնակարան, լոգանքի հետ կապված հարցերը հորաքրոջ ընտանիքն իրականացնում էր իր տանը, մինչև այն ժամանակ երբ արտագնա աշխատանքից վերադարձել է ընտանիքի հայրը՝  Յուրա Իսրաելյանը, սկսել բնակարանի ձևափոխման աշխատանքները և նոր տեխնիկա ձեռք բերելուց հետո շահագործել են նաև ջրատաքացուցիչը: Հիշում է նաև, որ ջրատաքացուցիչը տեսել է հատակին դրված, հարցրել է, թե ինչ է պատահել, Գայանե Ալեքսանյանը պատասխանել է, որ այն խափանվել է և խցափակվել է մասնագետի կողմից: Իսկ փաստաբանի հարցին, թե արդյոք վկան տեղյակ է, թե ինչու չէր միացված ձայնաազդանշանային սարքը, Լուսինե Ալեքսանյանը նշեց, որ վարդակի հետ է խնդիրը եղել:

Ամբաստանյալ Ա. Եսայանը նշեց որ 2021թ հունվարին ինքը Իսրայելյանների տուն առաջին այցն է իրականացրել, հետո՝ 2-րդ այցի ժամանակ տեսել է խոհանոցում դրված վառարանը, որտեղ դեպքի ժամանակ արդեն դրված էր նաև ջրատաքացուցիչը: Քանի որ խախտում է եղել, ինքը խցափակել է և կազմել արձանագրություն: Հիշում է, որ այդ ժամանակ ջրատաքացուցիչը դրված է եղել միջանցքում՝ հատակին: Նշեց, որ խցափակել է որպես բացակա գազասարք, քանի որ տանը դրված է եղել միայն խոհանոցի գազօջախը, որի օգտագործման համար եղել են բոլոր անհրաժեշտ պայմանները։

Վկա՝ Մեսրոպ Իսրայելյանի նախաքննական ցուցմունքը կողմերի համաձայնությամբ նախագահող դատավորը բարձրաձայն ընթերցեց, քանի որ վերջինս դատական նիստին չէր ներկայացել: Վկան Տուժող՝ Յուրա Իսրաելյանի եղբոր տղան է: Նախաքննական ցուցմունքում նշել է, որ իր հորեղբայրը արտագնա աշխատանքից վերադարձել է դեպքից մոտավոր մեկ ամիս առաջ, և իր տանն իրականացրել է վերանորոգման աշխատանքներ։ Այս վկան ևս գտնում էր, որ դեպքը տեղի է ունեցել Յուրա Իսրաելյանի անփութության պատճառով:

Նախագահող դատավոր Լուսինե Ալավերդյանը դատական նիստը հետաձգեց, այն նշանակելով 2022թ․ փետրվարի 8-ին:

Հոդվածը պատրաստել է «Մեդիաակումբ» ՔՀԶ ՀԿ-ն,
«Աջակցություն դատաիրավական բարեփոխումներին» ծրագրի շրջանակներում, որը իրականացնում է Եվրասիա համագործակցություն հիմնադրամը «Հելսինկյան ասոցիացիա» և «Իրավունքի ուժ»  հասարակական կազմակերպությունների հետ համատեղ:   Հոդվածի բովանդակությունը և արտահայտված տեսակետները միմիայն «Մեդիաակումբ» ՔՀԶ ՀԿ-ին են և կարող են չհամընկնել Եվրասիա համագործակցություն հիմնադրամի կամ «Հելսինկյան ասոցիացիա» և «Իրավունքի ուժ»  հասարակական կազմակերպությունների տեսակետներին:

Լոռու մարզպետ, Վանաձորում «Քաղաքացիական պայմանագիր» կուսակցության համայնքապետի թեկնածու Արամ Խաչատրյանն անհեթեթ է համարում պնդումները, թե Մամիկոն Ասլանյանը քաղաքական հալածանքների է ենթարկվում։ Ասում է՝ տեղյակ էր՝ սեպտեմբերին Պետական վերահսկողական ծառայությունն ստուգումներ էր իրականացնում համայնքապետարանում։ Գիտեր, որ խախտումներ հայտնաբերվել են, բայց դրանց բնույթի ու իրավական գործընթացի մասին մամուլից է իմացել։

Հարցին, թե արդյո՞ք իրավաչափ է կալանքի տակ պահել ամենաշատ թվով քվե ստացած թեկնածուին, երբ նոր ձևավորված ավագանին ընդամենը մի քանի օրից համայնքի ղեկավար է ընտրելու, պնդեց, թե չեն միջամտում իրավապահների գործողություններին։

«Ընտրությունների ցանկացած փուլում նրա նկատմամբ քրեական հետապնդում սկսելը կարող էր շահարկվել»,- ասում է մարզի ղեկավարը։

Ավելին, Արամ Խաչատրյանը կասկածներ է հայտնում, թե համայնքապետարանում քարոզարշավի շրջանում վարձավճարների անվան տակ երեք միլիոն դրամի ֆինանսական մուտքեր են արվել, որոնք կարող են որպես ընտրակաշառք դիտարկվել։

«Մուտքերն ավելացել են, այսինքն` բնակվարձի, աղբի վարձի և այլն, սրանք կասկածելի գործողություններ են, որ կարող էր նաև ազդել ընտրությունների վրա», — նշում է նա` հավելելով` ուսումնասիրել են՝ հիմնականում անապահով անձանց անունով են արվել վճարումները։ Դա է հենց կասկածի տեղիք տվել մարզի ղեկավարին, որ առայժմ ստուգում է փաստերը. «Այս պահին մեր ունեցած ռեսուրսներով, հարկ եղած դեպքում, իհարկե, կդիմենք իրավապահ մարմիններին»:

Հայաստանի վարչական դատարանն այսօր մերժեց դեկտեմբերի 5-ին Վանաձորի ավագանու ընտրություններին մասնակցած «Լուսավոր Հայաստան»-ի հայցը, որով կուսակցությունը փորձում էր պաշտպանել մանդատ ունենալու իր իրավունքը։

«Լուսավոր Հայաստանին» ընդամենը 0,03 տոկոս չբավարարեց անցողիկ շեմը հաղթահարելու և Վանաձորի ավագանիում առնվազն 1 մանդատ ունենալու համար։ Կուսակցության ներկայացուցիչների հաշվարկով՝ իրենց ստացած 1314 ձայներին ընդամենը 10 քվե պակասեց անցնելու համար։

Մինչդեռ Վանաձորի 63 տեղամասերում արձանագրվել էր 12 անճշտություն, որոնք կարող էին ազդեցություն ունեցած լինել ընտրությունների արդյունքների վրա, պնդում էին կուսակցության ներկայացուցիչները։ Որպես պատասխանող հանդես եկող թիվ 23 տարածքային ընտրական հանձնաժողովի նախագահ Տիգրան Պապանյանը դատական նիստի ժամանակ պնդել է, որ այդ անճշտությունները հավասարապես կարող էին անդրադառնալ ընտրություններին մասնակցած բոլոր 10 քաղաքական ուժերի արդյունքների վրա։

Վանաձորի ՏԻՄ ընտրություններում 4,03 տոկոս ձայն ստացած «Լուսավոր Հայաստան» կուսակցության հայցի մերժումից հետո վաղը թիվ 23 ՏԸՀ-ն ավագանի անցած 33 անդամներին մանդատներ կբաշխի։

Դեկտեմբերի 5-ի ընտրությունների արդյունքներով` 15 մանդատ կունենա նախկին համայնքապետ Մամիկոն Ասլանյանի գլխավորած դաշինքը, 9 մանդատ` «Քաղաքացիական պայմանագիրը», որի ցուցակը գլխավորում էր Լոռու մարզպետ Արամ Խաչատրյանը, 5 մանդատ` Հայաստանի աշխատավորական սոցիալիստական կուսակցությունը՝ համայնքապետի նախկին տեղակալ Արկադի Փելեշյանի գլխավորությամբ և 2-ական մանդատ` «Հայրենիք» ու «Ապրելու երկիր» կուսակցությունները։

Մանդատներն ստանալուց հետո ավագանին օրենքի ուժով պետք է գումարի իր առաջին նիստը։

Դսեղի բնակիչներ Հրայր Սահակյանը և Շահեն Քոչարյանը շուրջ 10 տարուց ավելի է խնդիրներ ունեն: Ինչպես նշում է Հրայր Սահակյանը, փորձությունը հասավ նաև իր քրոջ տղային, որն իր մոր հետ բնակվում իրենց տանը: Դեպքը տեղի է ունեցել 2019թ․ մարտի12-ին․ մանրամասների մասին, որպես ականատես, պատմում է Հրայր Սահակյանը:

Վիրավոր Պետրոս Քոչարյանին Հրայր Սահակյանը և իր տղան անմիջապես տեղափոխել են գյուղի ամբուլատորիա, սակայն ամբաստանյալը դրանով չի բավարարվել:

Դատական նիստերն, ըստ տուժողի պաշտպան Աստղիկ Պապիկյանի, անընդհատ տարբեր պատճառաբանություններով հետաձգվել են․ փոխվել է մի քանի դատավոր։ Այժմ գործը քննվում է դատավոր Լուսինե Ալավերդյանի կողմից: Դատական գործընթացի ձգձգվելու հետ կապված՝ փաստաբանն իր տեսակետն ունի:

Սակայն հույս է հայտնում, որ նոր դատավորը կիրականացնի արդար դատաքննություն:

Փաստաբան Աստղիկ Պապիկյանը նշեց նաև, որ  Շահեն Քոչարյանի ստորագրությամբ չհեռանալու խափանման միջոցը սխալ է ընտրված, քանի որ գործով տուժողների ընտանիքը ապրում է վախի մթնոլորտում:

Աստղիկ Պապիկյանը նշեց նաև, որ միջնորդություն են ներկայացրել դատարան, խափանման միջոցը փոխելու վերաբերյալ: Սակայն դատարանը հետաձգել է միջնորդության քննարկումը, նշելով, որ որոշակի ապացույցներ հետազոտելու կարիք կա. Այս հարցում մասնավորապես կարևորվում է մի վկայի հարցաքննությունը, որից էլ կախված է միջնորդության քննարկումը:

Գործում ներգրավված մյուս վկաների հետ կապված՝ փաստաբանը նշեց, որ դատավարությունը ձգձգվելու արդյունքում վկաների մի մասն արդեն դեպքի մանրամասները լավ չեն հիշում, մյուսներն էլ վախի մթնոլորտում են ապրում, և դա բարդացնում է դատական պրոցեսը:

2021թ․ նոյեմբերի 16-ին կայացած դատական նիստում վկաների հարցաքննության փուլն էր։
Հաջորդ դատական նիստը նշանակվեց 2022թ․ հունվարի 26-ին:

Հոդվածը պատրաստել է «Մեդիաակումբ» ՔՀԶ ՀԿ-ն,
«Աջակցություն դատաիրավական բարեփոխումներին» ծրագրի շրջանակներում, որը իրականացնում է Եվրասիա համագործակցություն հիմնադրամը «Հելսինկյան ասոցիացիա» և «Իրավունքի ուժ»  հասարակական կազմակերպությունների հետ համատեղ:   Հոդվածի բովանդակությունը և արտահայտված տեսակետները միմիայն «Մեդիաակումբ» ՔՀԶ ՀԿ-ին են և կարող են չհամընկնել Եվրասիա համագործակցություն հիմնադրամի կամ «Հելսինկյան ասոցիացիա» և «Իրավունքի ուժ»  հասարակական կազմակերպությունների տեսակետներին:

ՄԻԳ մարզային ռադիոյի եթերում Կինը հետքովիդյան և հետպատերազմական շրջանում»  հաղորդումն է․
Հեղինակ՝ Նարինե Մաթևոսյան․

Մեր հյուրերը՝
Լոռու մարզի գլխավոր հոգեբույժ՝ Գայանե Քալանթարյան․
Նշեմ, որ տիկին Քալանթարյանն արդեն 6-րդ անգամ ընտրվում է Վանաձորի, այս անգամ արդեն որպես խոշորացված համայնքի ավագանու անդամ․
Եվ, մեր հաջորդ հյուրը՝ Աշխեն Բաբայանը, Սպիտակի Հելսինկյան խումբ, իրավապաշտպան ՀԿ հիմնադիր-նախագահ, ընտանեկան բռնության հարցերով փորձագետ.

Հայաստանն աշխարհում առանձնանում է ընտանիքում տղա երեխաների նկատմամբ ունեցած նախընտրությամբ:
Ըստ «Կովկասի հետազոտական ռեսուրս կենտրոնների» 2021թ․ փետրվար-մարտ ամիսներին կատարած հետազոտության՝ հարցվածների 55 տոկոսը՝ կեսից մի քիչ ավելին՝ մատնացույց են արել, որ երեխայի սեռի հետ կապված որևէ նախապատվություն չունեն, եթե ընտանիքում կա մեկ երեխա,
իսկ 34 տոկոսը նշել էր, որ կնախընտրեին, որ երեխան տղա լինի։
Այս թվերը նշանակալիորեն տարբերվում են 2010թ․ այս նույն հարցին տրված պատասխաններից, երբ հարցվածների 54 տոկոսը նախընտրում էր տղա երեխա, 10 տարվա ընթացքում ունենք ուղիղ 20 տոկոս դրական տեղաշարժ։
Բայց, իհարկե, սա չի փոխում դեռևս հայ հասարակության մեջ կարծրատիպերն ու ընկալումները․

Կանանց դեմ ընտանեկան բռնությունները շարունակում են լայն տարածում ունենալ և դրանք առավել սրվեցին քովիդ-19-ի շրջանում․ դրանք նոր կորոնավիրուսի հետ կապված տեղաշարժի սահմանափակումներով էին պայմանավորված նաև:
ՄԻՊ-ն իր 2020թ․ տարեկան զեկույցում նշում է, որ Եղել են հաղորդումներ, որ սեռական ու ընտանեկան բռնության դեպքերում ոստիկանությունը, հատկապես Երևանից դուրս, դժկամությամբ է միջոցներ ձեռնարկել ու չի խրախուսել կանանց կողմից բողոքների ներկայացումը:

Գործող օրենսդրության համաձայն ընտանեկան բռնության դեպքերի մեծ մասը որակվել են որպես թեթև կամ միջին ծանրության գործեր, իսկ կառավարության կողմից չի ձևավորվել այս հանցանքներով զբաղվող բավարար քանակությամբ կին ոստիկանների և քննիչների կադրային բազա այս հանցագործությունները պատշաճ հասցեագրելու համար:

Կանանց հանդեպ ընտանեկան բռնությունների կանխարգելման գործում մեծ է հասարակական կարծիքն ու հասարակության դերակատարումը։
2021թ․ Աշխատանքի և սոցիալական հարցերի նախարարության աջակցման կենտրոններ դիմել է 1134 անձ, ընտանեկան բռնության ենթարկված 38 կին և 58 երեխա ապաստարան են տեղափոխվել, ոստիկանությունը փոխանցում է, որ այս տարի ընտանեկան բռնության և կնասպանության դեպքերը 1-ով նվազել է․ 2020-ին 5 կին է բռնությամբ սպանվել, 2021թ․-ին 4․
2020թ․-ին ընտանեկան բռնությունների հետ կապված ահազանգերի թիվը 444 է եղել, այս տարի՝ դեկտեմբերի 1-ի դրությամբ՝ 364․
Օրինակ կանանց ռեսուրս կենտրոնը նշում է, որ այս տարի 2658 զանգ են ստացել կանանցից․

Փորձը վկայում է, որ կանանց իրավունքների խախտումները հաճախ կապված են լինում իրազեկման ու գիտելիքների պակասի հետ, ուստի այս գործում մարդու իրավունքների կրթությունը կամ իրազեկումը նույնպես առաջնահերթ կարևորություն ունի և այստեղ նաև կնոջ կամքն է շատ կարևոր․..

Վարչապետ Նիկոլ Փաշինյանը Թբիլիսիում առանձնազրույց է ունեցել Վրաստանի կառավարության ղեկավար Իրակլի Ղարիբաշվիլիի հետ։ Զրուցակիցները կարևորել են Հայաստանի և Վրաստանի միջև տնտեսական համագործակցության միջկառավարական հանձնաժողովի հերթական նիստի անցկացումը, որը միտված է երկկողմ առևտրատնտեսական հարաբերությունների հետագա զարգացմանն ու ամրապնդմանը։

Նիկոլ Փաշինյանը և Իրակլի Ղարիբաշվիլին համոզմունք են հայտնել, որ երկու երկրների տնտեսական կապերի ընդլայնման մեծ ներուժ կա և ջանքերը պետք է ուղղել այն լավագույնս և արդյունավետ իրացնելու ուղղությամբ։ Երկու երկրների ղեկավարները մտքեր են փոխանակել նաև Հարավային Կովկասում տեղի ունեցող զարգացումների, ինչպես նաև երկկողմ հետաքրքրություն ներկայացնող այլ հարցերի շուրջ։

Ամերիկյան «Մոդերնա» ընկերությունը նախատեսում է կորոնավիրուսի «օմիկրոն» շտամի դեմ հատուկ պատվաստանյութի կլինիկական փորձարկումները սկսել 2022թ.-ի սկզբին։

Հայտարարության մեջ նշված է, որ հաշվի առնելով «օմիկրոն» շտամի տարածման արագությունը և գոյություն ունեցող պատվաստանյութերի ուժը, մոդերնայի խթանիչ դեղաչափը կծառայի առաջին հերթին հենց այս շտամի դեմ։

«Մոդերնան կշարունակի մշակել հատուկ պատվաստանյութ այս շտամի համար։ Հույս ունենք, որ դրա կլինիկական փորձարկումները կմեկնարկեն 2022թ.-ի սկզբին»,-նշված է ընկերության հայտարարության մեջ։

Նշենք, որ կորոնավիրուսի «օմիկրոն» շտամը հայտնաբերվել է Հարավային Աֆրիկայում։ ԱՀԿ-ն այս շտամը դասակարգել է որպես անհանգստություն առաջացնող։

Հավերժ ներկա…

Փարիզում ավարտվեց «Մանկական Եվրատեսիլ 2021»-ը, որում հաղթեց Հայաստանի ներկայացուցիչ Մալենան։

Մալենան  14 տարեկան է, ասում է՝ 7 տարի երազել է այս բեմում Հայաստանը ներկայացնելու մասին։ Սա «Մանկական Եվրատեսիլում» Հայաստանի ներկայացուցիչը դառնալու Մալենայի երրորդ փորձն էր։ Հաղթանակից հետո ելույթի ժամանակ Մալենան չկարողացավ զսպել արցունքները։

Նախորդ տարի նա արդեն ընտրվել էր «Մանկական Եվրատեսիլի» Հայաստանի պատվիրակ, սակայն 44-օրյա պատերազմի հետևանքով մեր երկրում հայտարարված ռազմական դրության պատճառով Հանրային հեռուստաընկերությունը չեղարկել էր միջազգային մրցույթին Հայաստանի մասնակցությունը:

Մալենայի իրական անունն Արփի է։ Նա դերասանուհի Աննա Մանուչարյանի դուստրն է։

Հիշեցնենք, որ Հայաստանը հաղթել է նաև «Մանկական Եվրատեսիլ 2010»–ին։ Այն ժամանակ երկիրը ներկայացնում էր Վլադիմիր Արզումանյանը։

Արտակարգ իրավիճակների նախարարությունը տեղեկացնում է, որ ՀՀ տարածքում կան փակ ավտոճանապարհներ։ Փակ է Արագածոտնի մարզում Ամբերդ ամրոցից դեպի Քարի լիճ տանող ավտոճանապարհը։ ժամանակավորապես փակ է նաև Զովունի գյուղից դեպի Կորեայի ձոր տանող ավտոճանապարհը՝ քարաթափման վտանգի պատճառով: Շիրակի մարզի Ամասիայի, Աշոցքի տարածաշրջաններում և Գյումրի քաղաքում տեղում է ձյուն։ Երևան-Երասխ ավտոճանապարհին մառախուղ է։ Արագածոտնի մարզի Ապարան-Արագած ավտոճանապարհին տեղ-տեղ առկա է մերկասառույց։

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է: Վարորդներին խորհուրդ է տրվում երթևեկել բացառապես ձմեռային անվադողերով։