Հայաստանի Հանրապետության արդարադատության նախարարության «Նուբարաշեն» քրեակատարողական հիմնարկում Հայոց բանակի կազմավորման 30-ամյակին, ինչպես նաև հայ զինվորի մեծարմանը նվիրված ցուցահանդես-վաճառքից գոյացած ամբողջ հասույթը փոխանցվելու է «Զինվորի տուն» վերականգնողական կենտրոնին: «Արմենպրես»-ի փոխանցմամբ՝ այս մասին տեղեկանում ենք Քրեակատարողական ծառայության տարածած հաղորդագրությունից:

«Ճակատագրի բերումով ճաղերից այն կողմ հայտնված անձանց համար սահմանափակ ազատությունը խոչընդոտ չէ՝ նպատակային օգտագործելու իրենց առօրյան և հաղորդակից լինելու գեղեցիկին:

Այդ մասին է վկայում փետրվարի 9-ին Հայաստանի Հանրապետության արդարադատության նախարարության «Նուբարաշեն» քրեակատարողական հիմնարկում Հայոց բանակի կազմավորման 30-ամյակին, ինչպես նաև հայ զինվորի մեծարմանը նվիրված ցուցահանդես-վաճառքը, որն իրականացվել է հիմնարկի սոցիալական, հոգեբանական և իրավական աշխատանքների բաժնի նախաձեռնությամբ, հիմնարկի պետ, արդարադատության գնդապետ Աղասի Խաչատրյանի օժանդակությամբ: Ցուցահանդեսին ներկայացված էին հիմնականում ցմահ դատապարտյալների ձեռքի բազմաբնույթ աշխատանքները և նրանց կողմից հեղինակած գրքերը:

Դատապարտյալների ցանկությամբ՝ ցուցահանդեսի վաճառքի ողջ հասույթը փոխանցվելու է «Զինվորի տուն» վերականգնողական կենտրոնին:

Իրենց աշխատանքներով հանդես եկած ազատազրկված անձինք հիմնարկի պետի կողմից կարժանանան խրախուսանքների»,- ասված է հաղորդագրության մեջ:

Նշվում է, որ միջոցառմանը ներկա էին ՀՀ արդարադատության նախարարի տեղակալ Արփինե Սարգսյանը, Քրեակատարողական ծառայության պետ Սերգեյ Ատոմյանը, Ծառայության վարչակազմը, Ազգային ժողովի պատգամավորներ, ՄԻՊ ներկայացուցիչներ, ՀՀ ԱՆ ՔԿՀ-ներում և մարմիններում հասարակական վերահսկողություն իրականացնող հասարակական դիտորդների խմբի նախագահը, Պրոբացիայի ծառայության պետը, Պաուերլիֆտինգի ֆեդերացիայի նախագահը, հիմնարկի հոգևոր հայր Տեր Գրիգոր քահանա Հովհաննիսյանը և այլ հյուրեր:

Իրենց աշխատանքներով հանդես եկած ազատազրկված անձինք հիմնարկի պետի կողմից կարժանանան խրախուսանքների:

Փետրվարի 9-ից սկսած Ալավերդու բժշկական կենտրոնում և Թումանյանի տարածաշրջանի 8 բուժհաստատություններում կցագրված 50-69 տարեկան կանայք հնարավորություն ունեն անցնելու կրծքագեղձի մամոգրաֆիկ անվճար հետազոտություն:

Ցանկացողները կարող են հերթագրվել՝ դիմելով իրենց ընտանեկան բժշկին կամ թերապևտին՝ այս մասին ետղեկացնում է Լոռու մարզպետարանը։

Օրերս Ադրբեջանի իշխանությունները ի դեմս Մշակույթի նախարարի հանդես են եկել հերթական հակահայկական նախաձեռնությամբ:

Համաձայն վերջինիս հայտարարության՝ Ադրբեջանում ձևավորվել է տեղի և արտերկրյա մասնագետներից կազմված «Աղվանական պատմության և ճարտարապետության մասնագետների աշխատանքային խումբ», որի նպատակն է, այսպես կոչված, աղվանական կրոնական տաճարներից հեռացնել «հայերի թողած կեղծ հետքերը»:

Մայր Աթոռ Սուրբ Էջմիածինը դիմում է Ղարաբաղյան հակամարտության կարգավորման մեջ ներգրավված բոլոր երկրներին, առաջին հերթին ԵԱՀԿ Մինսկի խմբի համանախագահող պետություններին, քույր եկեղեցիներին ու կրոնական կառույցներին, միջազգային մասնագիտացված կազմակերպություններին՝ խստագույնս արձագանքելու Ադրբեջանի կողմից իրականացվող մշակութային եղեռնագործության անթաքույց այս փաստին՝ կասեցնելու և կանխելու համար վանդալիզմի այս ու նմանօրինակ դրսևորումները:

Ազգային վիճակագրական կոմիտեն հրապարակել է հունվար ամսվա սպառողական գների ինդեքսը (ՍԳԻ) 2022թ.-ի գնաճի տվյալների փոփոխությունը 2021թ.-ի համապատասխան ամսվա նկատմամբ։ Այս մասին փոխանցում է ԳԱԼԱ-ն:

Հայաստանի Հանրապետության սպառողական շուկայում 12-ամսյա գնաճը (2022թ. հունվարը՝ 2021թ. հունվարի նկատմամբ) կազմել է 7.1%, իսկ նախորդ ամսվա նկատմամբ՝ 1.6%: 2022թ. հունվարին 2021թ. դեկտեմբերի համեմատ հանրապետությունում արձանագրվել է սննդամթերքի և ոչ ալկոհոլային խմիչքի 3.8% գնաճ:

Այսպիսով՝ հացաբուլկեղենի և ձավարեղենի գինը նախորդ տարվա նույն ամսվա նկատմամբ աճել է 10.4%-ով, իսկ 2022թ.-ի հունվարին դեկտեմբերի նկատմամբ՝ 1.2%-ով: Մսի գինը աճել է 8.1%-ով, (2022թ.-ի հունվարին դեկտեմբերի նկատմամբ`0.8%), կաթնամթերքի, պանրի և ձվի գինը աճել է 11.4%-ով (2022թ.-ի հունվարին դեկտեմբերի նկատմամբ՝ 1.1%): Բանջարեղենինը՝ 36.8%-ով, 2022թ.-ի հունվարին դեկտեմբերի նկատմամբ` 20.01%:

2022թ. հունվարին 2021թ. դեկտեմբերի համեմատ ոչ պարենային ապրանքների շուկայում գրանցվել է 0.1% գնաճ:

2022թ.-ի հունվարին 2021թ. հունվարի նկատմամբ հագուստի գինն աճել է 11.8%-ով, կոշկեղենը՝ 9.6%-ով:

2022թ. հունվարին 2021թ. դեկտեմբերի համեմատ բենզինի և դիզելային վառելիքի գները նվազել են 2.1% և 0.6%-ով, իսկ 2021թ. հունվարի համեմատ արձանագրվել է 36.0% և 44.1% գնաճ:

2022թ. հունվարին 2021թ. դեկտեմբերի համեմատ՝ ծառայությունների սպասարկման ոլորտում գրանցվել է 0.4% հավելաճ:

Մասնավորապես՝ բժշկական ծառայությունների դիմաց սպասարկվող վճարը 2022թ.-ի հունվարին 2021թ. հունվարի նկատմամբ ավելացել է 1.3%-ով, սպասարկման ծառայություններինը (ռեստորանների, սրճարանների և համանման ծառայությունների)՝ 6.6%-ով:

2022թ. հունվարին 2021թ. դեկտեմբերի համեմատ տրանսպորտային ծառայությունների սակագները նվազել են 1.1%-ով և նվազումը պայմանավորվել է

օդային տրանսպորտով միջազգային չվերթների ծառայությունների գների 4.3% նվազումով (ներքաղաքային տրանսպորտի ծառայությունների սակագները նշված ժամանակահատվածում մնացել են անփոփոխ):

2022թ.-ի հունվարի 1-ից սահմանվել են խմելու ջրի մատակարարման և ջրահեռացման (կեղտաջրերի հեռացման) ծառայությունների նոր սակագներ, ինչի արդյունքում սակագներն աճել են 11.37%-ով: Միաժամանակ, սոցիալապես անապահով բնակիչ-բաժանորդների համար սակագների մակարդակը մնացել է անփոփոխ: Նշված փոփոխությունների հետևանքով խմելու ջրի մատակարարման և ջրահեռացման (կեղտաջրերի հեռացման) ծառայությունների միջինացված սակագների փոփոխությունը նպաստել է ՍԳԻ-ի ընդհանուր աճին 0.1 տոկոսային կետով:

2022թ.-ի հունվարին 2021թ.-ի դեկտեմբերի համեմատ մատուցված ծառայությունների գներն աճել են 0.4-0.7%-ով:

«Դինամո» մարզահամալիրում Հայաստանի մեծահասակների բռնցքամարտի առաջնությունից մի քանի օր անց պայքարի մեջ են մտել նաեւ երիտասարդները:

Մասնակցել են 150-ից ավելի մարզիկներ: Հաղթողներ են դարձել Թովմաս Թովմասյանը (48 կգ), Արեն Ասլամազյանը (51 կգ), Գոռ Ազիզյանը (54 կգ), Մանվել Պետրոսյանը (57 կգ), Սարգիս Շահվերդյանը (60 կգ), Արթուր Մկրտչյանը (63,5 կգ), Արես Հակոբյանը (67 կգ), Գարիկ Անտանոսյանը (71 կգ), Տարոն Սարգսյանը (75 կգ), Համլետ Ադամյանը (80 կգ), Աղվան Ալեքսանյանը (86 կգ), Ավետիք Հովակիմյանը (92 կգ) եւ Ալբերտ Հարությունյանը (+92 կգ):

Սպիտակի ԵՄՔԱ-ում տեղի ունեցավ Սպիտակ խոշորացված համայնքի սեղանի թենիսի բաց առաջնություն: Սպիտակի ԵՄՔԱ-ում նման առաջնությսւնները դեռ վաղուց էր որոշվել ավանդույթ դարձնել և ամեն տարի Սպիտակ համայնքում կազմակերպել սեղանի թենիսի Հայաստանի բաց առաջնություն՝ ակնկալելով նաև համաքաղաքացիների և գործարարների գործուն աջակցությունը, որոնք տարվա ընթացքում կրելու են շարունակական բնույթ։
Առաջնությանը ներկա էին Սպիտակ խոշորացված համայնքի ղեկավար Քաջայր Նիկողոսյանը, Լոռու մարզպետի օգնական Էրիկ Կոստանյանը, Սպիտակի ԵՄՔԱ-ի տնօրեն Ալվարդ Մկրտչյանը, պաշտոնատար այլ անձինք և բնակիչներ։ Մարզիկները մարտական էին տրամադրված, և առաջնությունն ընթացավ թեժ պայքարում, նրանք ցուցադրեցին գեղեցիկ և գրագետ խաղ:

Առաջնության առաջին, երկրորդ և երրորդ պատվավոր տեղերն զբաղեցրած մասնակիցները պարգևատրվեցին մեդալներով և պատվոգրերով։
Համայնքի ղեկավար Քաջայր Նիկողոսյանը շնորհավորեց մարզիկներին ձեռք բերած հաջողությունների համար, շնորհակալություն հայտնեց մշտապես համայնքի մարզական պատիվը բարձր պահելու համար և իր պատրաստակամությունը հայտնեց աջակցելու նրանց   թե’ լիարժեք մարզումներին, և թե’ մասնակցությանը տարբեր մրցումներին:
Շնորհավորում ենք մեր մարզիկներին և մաղթում նորանոր հաջողություններ, ձեռքբերումներ ու պատվավոր առաջին հորիզոնականներ։