Մարդու իրավունքների պաշտպան Քրիստիննե Գրիգորյանն այսօր ընդունել է Հայաստանում Ֆրանսիայի Հանրապետության արտակարգ և լիազոր դեսպան Անն Լույոյին:

Պաշտպանը դեսպանին ներկայացրել է ՄԻՊ հաստատության մի շարք առաջնահերթություններ,  այդ թվում`  անվտանգության հարցերում իրավունքահենք մոտեցումների ամրապնդումը և հետպատերազմական հումանիտար հարցերը՝ առանձնահատուկ շեշտելով գերիների ու պահվող քաղաքացիական անձանց վերադարձի, ատելության խոսքի դեմ պայքարի կարևորությունը, կանանց իրավունքների պաշտպանությունն ու ընտանեկան բռնության կանխարգելմանն ուղղված ՄԻՊ աշխատանքների տեսլականը:

Հանդիպման ընթացքում կողմերը քննարկել են երկկողմ համագործակցության մի շարք առաջնահերթություններ և մարդու իրավունքների պաշտպանության ընդհանուր վիճակին առնչվող հարցերի լայն շրջանակ՝ ինչպես Հայաստանում, այնպես էլ նրա սահմաններից դուրս, մասնավորապես՝ Ուկրաինայում գտնվող ազգությամբ հայերի իրավունքների պաշտպանության հարցեր:

Պաշտպանն անդրադարձել է նաև նախորդ շաբաթ Արցախ կատարած այցի արդյունքում արձանագրած փաստերին: Պաշտպանը նշել է, որ հատկապես մտահոգիչ է համարում սահմանամերձ կամ ադրբեջանական հենակետերին մոտ տեղակայված գյուղերում ադրբեջանական զինված ուժերի սադրանքները՝ վկայակոչելով Խրամորթում և Նորշենում տեղի ունեցած վերջին դեպքերը:

Պաշտպանի դիրքորոշմամբ սա շարունակվող, կազմակերպված և մեկ կետից կառավարվող քաղաքականության արդյունք է: Տվյալ քաղաքականության ապացույց է նաև երկու հայ ռազմագերիների՝ Իշխան Սարգսյանի և Վլադիմիր Ռաֆայելյանի նկատմամբ հարուցված դատավարությունները, ովքեր վերջերս դատապարտվեցին համապատասխանաբար 18 և 19 տարի ազատազրկմամբ: Պաշտպանը նշել է, որ սրանք արհեստական դատավարություններ են, ինչը Ժնևյան կոնվենցիայի կոպիտ խախտում է:

Դեսպան Լույոն իր հերթին բարձր է գնահատել Պաշտպանի հաստատության դերը երկրում՝ մարդու իրավունքների պաշտպանության և ամրապնդման հարցում: Դեսպանի առաջարկով մոտ ապագայում նախանշվել է ՄԻՊ Քրիստիննե Գրիգորյանի և Ֆրանսիայի Օմբուդսմանի հանդիպման կազմակերպումն ու փոխադարձ հետաքրքրություն ներկայացնող ոլորտներում փորձի  փոխանակումը:

Հանդիպման ավարտին Պաշտպանը բարձր է գնահատել Ֆրանսիայի դեսպանատան հետ համագործակցությունը, և կողմերը վերահաստատել են մարդու իրավունքների պաշտպանության ոլորտում համագործակցելու և ոլորտներն ընդլայնելու իրենց պատրաստակամությունը:

Ռուսաստանի նախագահի մամուլի քարտուղար Դմիտրի Պեսկովը հայտնել է, որ Մոսկվան Կիևին հայտնել է Ուկրաինայում ռուսական զինված ուժերի հատուկ գործողությունը դադարեցնելու պայմաններ։ Այս մասին հայտնում է РИА Новости-ն։

Նրա խոսքով՝ գործողությունը կարող է ավարտվել «ցանկացած պահի», եթե Ուկրաինայի իշխանությունները կատարեն ռուսական կողմի պայմանները։

Կրեմլի խոսնակն ընդգծել է, որ Ուկրաինան պետք է փոփոխի Սահմանադրությունը և հրաժարվի «ցանկացած բլոկին» միանալու հավակնություններից։ Բացի այդ, նա պետք է ճանաչի Ղրիմը որպես ռուսական, ինչպես նաև Դոնեցկի և Լուգանսկի ժողովրդական հանրապետությունների անկախությունը։

«Մենք փաստացի ավարտում ենք Ուկրաինայի ապառազմականացումը։ Մենք դա ավարտին կհասցնենք… Նրանք (ուկրաինացիները) պետք է դադարեցնեն ռազմական գործողությունները»,- ասել է Պեսկովը:

Կադաստրի կոմիտեի հայտարարությունը․

2021թ-ի ընթացքում կառուցված ինքնակամ շինությունների պարտադիր հաշվառման վերջնաժամկետը մարտի 15-ն է։ Մինչև մարտի 15-ը հաշվառում չիրականացնելու դեպքում 2021թ-ի ընթացքում կառուցված ինքնակամ շինություններն այլևս ենթակա չեն լինի օրինականացման։

Հիշեցնենք, որ նոր կարգավորումների համաձայն՝ 2022 թվականի հունվարի 6-ից հետո կառուցված ինքնակամ կառույցների օրինականացումը բացառվելու է։

Օրենքով նախատեսված է ինքնակամ կառույցների հաշվառման համար հետևյալ ժամանակացույցը.

 2021 թվականի հունվարի 1-ից մինչև 2022 թվականի հունվարի 6-ը կառուցված ինքնակամ
կառույցները պետք է հաշվառել մինչև 2022 թվականի մարտի 15-ը։

 Մինչև 2021 թվականի հունվարի 1-ը Երևան քաղաքի վարչական սահմաններում կառուցված ինքնակամ կառույցների դեպքում` հաշվառել մինչև 2023 թվականի հունվարի 1-ը։

 Մինչև 2021 թվականի հունվարի 1-ը քաղաքային բնակավայր ընդգրկող համայնքների
վարչական սահմաններում կառուցված ինքնակամ կառույցների դեպքում` հաշվառել մինչև
2024 թվականի հունվարի 1-ը։

 Մինչև 2021 թվականի հունվարի 1-ը բացառապես գյուղական բնակավայրերից բաղկացած
համայնքների վարչական սահմաններում կառուցված ինքնակամ կառույցների դեպքում`
հաշվառել մինչև 2025 թվականի հունվարի 1-ը:

Հաշվառման նպատակով շահառուն դիմում է Կադաստրի կոմիտեի կողմից որակավորման վկայական ստացած չափագրողին։ Վերջինս իրականացնում է հաշվառման (չափագրման) աշխատանքներ և արդյունքները համաձայնեցնում է շահառուի հետ։

Հաշվառման փաթեթը առցանց չափագրման գրասենյակ ներբեռնելու և այն հաստատելու պահից ձևավորվում է չափագրման ծածկագիր և ինքնակամ կառույցը համարվում է հաշվառված Կադաստրի կոմիտեի կողմից, որի վերաբերյալ պատվիրատուն տեղեկացվում է նաև կարճ հաղորդագրության միջոցով (sms)։ Հարկավոր է իմանալ, որ հաշվառված լինելը դեռևս չի երաշխավորում, որ ինքնակամ կառույցը կօրինականացվի։ Դրա համար անհրաժեշտ է, որ կառույցը համապատասխանի օրենսդրական պահանջներին։

Մարտի 7-ին, ժամը 14:10-ին Լոռու մարզային ճգնաժամային կառավարման կենտրոն տեղեկություն է ստացվել, որ Վանաձոր քաղաքի «Կոնգո» թաղամասի գերեզմանատանն այրվում է խոտածածկ տարածք։

Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատներից երկու մարտական հաշվարկ:

Հրդեհը մեկուսացվել է ժամը 15։57-ին, մարվել՝ 16։21-ին։ Այրվել է մոտ 35 հա խոտածածկույթ։

Հրդեհաշիջման աշխատանքներին մասնակցել են «Հայանտառ» ՊՈԱԿ «Վանաձորի անտառտնտեսության» 8 աշխատակից։

Ռուս-ուկրաինական պատերազմի հետևանքով բնակչության արտահոսք է սկսվել ինչպես Ուկրաինայում, այնպես էլ Ռուսաստանում։ ՌԴ բազմաթիվ քաղաքացիներ ժամանակավորապես լքում են երկիրը՝ տեղափոխվելով հարևան երկրներ։

Երևան ժամանած ՌԴ քաղաքացիների թիվը ևս մեծ է։ Այսօր Երևանի փողոցներում արդեն նկատելի էին մեծ թվով ռուսներ, ովքեր ժամանակավոր բնակություն են հաստատել Երևանում։

Նշենք, որ ՌԴ քաղաքացիների ներհոսքով պայմանավորված՝ Երևանում կտրուկ աճել են վարձակալությամբ տրվող բնակարանների գները։

ՌԴ նախագահ Վլադիմիր Պուտինը փետրվարի 24-ին հայտարարել էր հատուկ ռազմական օպերացիա սկսելու որոշման մասին: Նա հայտնել էր, որ Դոնբասի ժողովրդական հանրապետություններն օգնության խնդրանքով դիմել են։ Ուկրաինայի նախագահ Վլադիմիր Զելենսկին ռազմական դրություն էր հայտարարել երկրի ողջ տարածքում: ԱՄՆ-ն ու եվրոպական մի շարք երկրներ սահմանել են պատժամիջոցներ Ռուսաստանի նկատմամբ: Վերջինս հանդես է գալիս պատասխան պատժամիջոցներով:

Վանաձորցի Ռիմա Հակոբյանի 4 տղաներն ամեն տարի արտագնա աշխատանքի են մեկնում և ընտանիքի եկամտի հիմնական աղբյուրը Ռուսաստանից են ուղարկում։ Ռուբլու անկումը մեծ խնդիրներ է առաջացրել ընտանիքում։

Այս ընտանիքը միակը չի Վանաձորում և Հայաստանում։ Փետրվարի 27-28-ի դրությամբ փոխանակման կետերում ռուսական ռուբլին 5․50-ից իջավ՝ հասնելով մինչև երկուսուկես դրամի։ Վանաձորում բնակվող Հակոբյանների ընտանիքում արդեն խուճապ է, քանի որ եկամտի հիմնական աղբյուրը Ռուսաստանից են ստանում, իսկ ռուբլու փոխարժեքը կտրուկ նվազել է։ Նրանց ընտանիքը եզակիներից չէ, բազմաթիվ ընտանիքների եկամտի աղբյուրը արտագնա աշխատանքից է գոյանում։

Փոխանակման կետերում նշում են, որ ռուբլու անկմանը զուգընթաց վերջին մի քանի օրերի ընթացքում պահանջարկն ավելի է մեծացել, իսկ ռուբլու մուտքերը նվազել են մոտ 70 տոկոսով։ Գառնիկ Եզեկելյանը սա աննախադեպ է համարում, քանի որ վերջին 12 տարիների ընթացքում նման դեպք չի հիշում։ Տնտեսագետ Հրայր Պապոյանը ռուբլու կտրուկ անկման հիմնական պատճառը գտնում է տնտեսվարողների վարքագծի մեջ։

Եվ եթե Ռուսաստանի դեմ պատժամիջոցների կիրառումը լինի երկարաժամկետ ապա Հայաստանի տնտեսության զարգացման ռազմավարությունը պետք է արմատապես փոխվի։ Սա կլինի Հայաստանի կողմից իրականացվող առաջին քայլը։ Ըստ տնտեսագետի այս ճգնաժամը Հայաստանի համար նոր հնարավորություններ է բացում, որոնցից ճիշտ և ժամանակին օգտվելու դեպքում տնտեսությունը կզարգանա։ Իսկ թե ինչ է սպասվում մոտ ապագայում դեռևս անհայտ է, ամեն ինչ կախված է պատերազմի ավարտից։ Միայն դրանից հետո կտրուկ քայլեր կարվեն տնտեսությունը զարգացնելու ուղղությամբ։

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բեռնատարների համար։

Եվրամիությունը պետք է ամբողջությամբ ազատվի Ռուսաստանից էներգակիրներից՝ դիվերսիֆիկացման, էներգաարդյունավետության և էներգետիկ այլ աղբյուրների անցման միջոցով, Մադրիդում կայացած մամուլի ասուլիսում հայտարարել է Եվրահանձնաժողովի նախագահ Ուրսուլա ֆոն դեր Լայենը։

«Էներգետիկան շարունակում է մնալ կարևորագույն խնդիրներից մեկը։ Եվրամիությունը պետք է ձերբազատվի ռուսական նավթից, գազից և ածուխից կախվածությունից. Դա անելու համար մենք պետք է դիվերսիֆիկացնենք մատակարարումները, ավելի լավ արդյունքների հասնենք էներգաարդյունավետության ոլորտում և պետք է զանգվածաբար ներդրումներ կատարենք վերականգնվող էներգիայի աղբյուրներում», – Եվրահանձնաժողովի նախագահի խոսքերը մեջբերում է ՏԱՍՍ-ը։