Հունիսի 12-ին` ժամը 11.40-ի սահմաններում, Թումանյանի պահպանության բաժնի մի ոստիկան Հաղպատ գյուղում ծառայության ընթացքում ճանապարհին նկատել է արյունոտ դեմքով մի քաղաքացու և մոտեցել նրան: Քաղաքացին հայտնել է, որ րոպեներ առաջ երկու հոգի իրեն ծեծել են, դանակի սպառնալիքով հափշտակել 100 դոլար, 13 հազար դրամ ու փաստաթղթերը և փախել։

Ստանալով ահազանգը` Քրեական ոստիկանության Լոռու մարզային վարչության ծառայողներն անցան գործի: Տուժողից ընդունվեց հաղորդում: Նա պատմեց, որ Ապարան քաղաքի վերջնամասում կանգնեցրել է կարմիր գույնի ավտոմեքենա, որի մեջ եղել են վարորդն ու նրա կողքը նստած ուղևոր: Խնդրել է իրեն հասցնել Հաղպատ, նրանք համաձայնել են՝ հայտնելով, որ գնում են Վանաձոր: Հաղպատ չհասած մեքենան կանգնեցրել են, վարորդը ներսից փակել է դռան փականները, իսկ ուղևորը շրջվելով` տուժողի պարանոցին է մոտեցրել դանակ և պահանջել, որ տա մոտը եղած ողջ գումարը։ Ըստ նրա` ձեռքերով պաշտպանվել է, փորձել դուրս գալ մեքենայից, սակայն ուղևորը դանակով մի քանի անգամ հարվածել է ազդրին՝ փորձելով գրպանից հանել դրամապանակը։ Այդ ընթացքում կարողացել է դուրս գալ ավտոմեքենայից:

Զբոսարջիկը տեղափոխվեց բուժօգնության, իսկ ոստիկանության տարբեր ստորաբաժանումների համագործակցված օպերատիվ-հետախուզական միջոցառումներն արագ արդյունք տվին: Քրեական ոստիկանության Տավուշի և Լոռու մարզային վարչությունների և Համայնքային ոստիկանության տարածքային ստորաբաժանումների, ինչպես նաև պարեկների համագործակցված աշխատանքի արդյունքում դեպքից կարճ ժամանակ անց Նոյեմբերյան քաղաքում հայտնաբերվեցին ու ձերբակալվեցին «Օպել Աստրա» մակնիշի կարմիր մեքենայի վարորդ, Վանաձորի Երևանյան խճուղու բնակիչ 33-ամյա տղամարդն ու Գյումրիի Շիրակշին բանավանի բնակիչ 28-ամյա ուղևորը:

Վարորդի խուզարկությամբ հայտնաբերված բջջային հեռախոսին կային արնանման հետքեր, իսկ ուղևորի խուզարկությամբ հայտնաբերվել է մեկ 100-դոլարանոց, 12 հազարի թղթադրամ և մետաղադրամներ:
Թումանյանի քննչական բաժնում նախաձեռնվել է քրեական վարույթ: Վանաձորցին ու գյումրեցին տեղափոխվել են ձերբակալվածների պահման վայր:
Ձեռնարկվում են միջոցառումներ հանցագործության գործիք դանակը հայտնաբերելու ուղղությամբ։ Հանգամանքները պարզվում են:

Հունիսի 11-ին, ժամը 08։34-ին Գեղարքունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Ճամբարակ քաղաքի Գարեգին Նժդեհի փողոցի շենքերից մեկի բնակարաններից մեկում հրդեհ է բռնկվել։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ  և փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական 2 խումբ՝ կինոլոգներով։

Ըստ նախնական տվյալների՝ շենքի բնակարաններից մեկում տեղի է ունեցել գազի պայթյուն․ կան տուժածներ և չորս զոհ։

Կտրվի լրացուցիչ տեղեկատվություն։

Այսօր՝ հունիսի 9-ին, Լոռու մարզային հոգենյարդաբանական դիսպանսերում անցկացվել է «Լոռու մարզում հոգեկան առողջության խնդիրներ ունեցող անձանց և նրանց ընտանիքի անդամների փոխօգնության աշխատանքային խմբի» նիստը, որը վարել է աշխատանքային խմբի ղեկավար, մարզպետի պաշտոնակատար Հովհաննես Ավետիսյանը:

Աշխատանքային խմբի անդամ, մարզպետի աշխատակազմի առողջապահության և սոցիալական ոլորտի հարցերի վարչության գլխավոր մասնագետ Վալերի Ջաղինյանը ներկայացրել է աշխատանքային խմբի կողմից նախորդ նիստից հետո ընկած ժամանակաշրջանում կատարված աշխատանքները ու նաև տեղեկացրել, որ նիստի հյուրերն են «Հոգեկան առողջության իրազեկման նախաձեռնություն» հկ ծրագրի ղեկավար Մարիամ Ղարիբյանը և նախագծի մասնագետ Ջեմմա Հովհաննիսյանը: Վերջիններս ներկայացրել են հասարակական կազմակերպության կողմից իրականացվող «Հոգեբանական աջակցություն հոգեկան առողջության խնդիր ունեցող անձանց խնամակալներին և ընտանիքի անդամներին», «Հոգեբանական աջակցություն բռնի տեղահանված անձանց» ծրագրերը և իրազեկել, որ կազմակերպությունը գործարկել է «Անվճար ծառայությունների տրամադրման հարթակ» և «Հուզական աջակցության թեժ գիծ»՝ 📞0800 00 900 հեռախոսահամարով:

Հ. Ավետիսյանը կարևորել է կազմակերպության պատրաստակամությունը՝ համագործակցելու Լոռու մարզի համապատասխան պետական և հասարակական կառույցների հետ՝ ընդգծելով, որ այդ գործակցությունը մեծապես կարող է նպաստել ոլորտին առնչվող մի շարք մարտահրավերների հաղթահարմանը:

«Արփի» հկ նախագահ Սոֆիկ Մինասյանը տեղեկատվություն է ներկայացրել կազմակերպության կողմից իրականացվող աշխատանքների մասին՝ մասնավորապես զոհվածների, զինհաշմանդամների, անհետ կորածների ընտանիքների անդամներին, պատերազմ մասնակից զինծառայողներին, ԼՂՀ բռնի տեղահանված ընտանիքներին ուղղված հոգեբանական աջակցության ծրագրերի վերաբերյալ:

Անդրադարձ է կատարվել նաև «Խնամք» հկ-ի Սպիտակի խնամքի տան(պատասխանատու Բավական Պետրոսյան) գործունեությանը, կենտրոնի շահառուների մասնակցությամբ մշակութային միջոցառումներին, ինչպես նաև «Լուսաստղ» բարեգործական հկ-ի(նախագահ Անի Գաբրիելյան) կողմից իրականացվող «Հոգեկան առողջության խնամքը` հույզերի կառավարման գրավական» ծրագրին:

Քննարկվել են կազմակերպությունների փոխգործակցությանը վերաբերող հարցեր՝ տարբեր սոցիալական խմբերին անհրաժեշտ աջակցություն ցուցաբերելու համար:

Ներկաները Լոռու մարզային հոգենյարդաբանական դիսպանսերի տնօրեն Արթուր Ղուլիջանյանի ուղեկցությամբ շրջել են նաև հաստատությունում, ծանոթացել վերջինիս գործունեությանը:

ՀՀ պաշտպանության նախարարությունը հայտարարում է 2025 թվականի ամառային զորակոչի ընթացքում շարքային կազմի պարտադիր զինվորական ծառայության զորակոչի ենթակա քաղաքացիներին ԶՈՒ պատվո պահակային վաշտում զինվորական ծառայության նշանակելու նպատակով զորակոչիկների ընտրություն անցկացնելու մասին։

Զորակոչիկների ընտրությունն անցկացվելու է N զորամասում հետևյալ ժամանակացույցով.

ա) 2025 թվականի հուլիսի 9-ին՝ ժամը 10։00-ին, ՊՆ հանրապետական զինվորական կոմիսարիատի Երևանի զինվորական կոմիսարիատների զորակոչիկներից,

բ) 2025 թվականի հուլիսի 10-ին՝ ժամը 10։00-ին, ՊՆ հանրապետական զինվորական կոմիսարիատի մարզային զինվորական կոմիսարիատների զորակոչիկներից։

Զինված ուժերի պատվո պահակային վաշտում ծառայել ցանկացող, զորակոչի ենթակա քաղաքացիները դիմումների ներկայացման կամ այլ հարցերի համար կարող են դիմել հաշվառման վայրի զինվորական կոմիսարիատներ:

🔗 https://t.me/mil_armenia

Հունիսի 7-ին Վանաձոր համայնքի ղեկավարի պաշտոնակատար Արկադի Փելեշյանը հյուրընկալել է Վանաձորի քույր քաղաք Ռուսաստանի Դաշնության Պոդոլսկի քաղաքապետ Գրիգորի Արտամոնովին, նրա տեղակալներ Ալեքսանդր Մամլային, Անժելա Ստուդենիկինային, Օլգա Շաշկովային և աշխատակազմի քարտուղար Դմիտրին Սեմյոնովին։ Քույր քաղաքի պատվիրակության հետ անցկացվել է ջերմ և արդյունավետ հանդիպում։ Քննարկվել են երկու քաղաքների միջև համագործակցության ընդլայնման ուղղությունները, փորձի փոխանակման և մշակութային կապերի խորացման հեռանկարները։

Քույր քաղաքները երկուստեք ցանկություն են հայտնել խորացնել բազմաբնույթ համագործակցությունը, ավելի հաճախ կատարել փոխադարձ այցելություններ, ինչպես նաև դիտարկել տնտեսական կապերի հաստատման և համատեղ նախաձեռնությունների իրագործման ուղղությամբ ծրագրեր՝ նպաստելով տարածաշրջանային զարգացմանն ու փոխշահավետ համագործակցությանը։

Կողմերը միմյանց փոխանցել են հուշանվերներ՝ որպես բարեկամության և փոխադարձ հարգանքի խորհրդանիշ։
Պաշտոնյաներն այցելել են Մեծ եղեռնի զոհերի հիշատակին նվիրված հուշակոթող, որտեղ ծաղիկներ են խոնարհել’ հարգանքի տուրք մատուցելով 1915 թվականի անմեղ զոհերի հիշատակին։

Պոդոլսկի պատվիրակությունը Վանաձորի համայնքապետարանի պաշտոնյաների ուղեկցությամբ հանդիպել է Հայրենական պատերազմի վետերան Հենրիետա Մխիթարյանի և Վանաձորում «Ռոսսոտրուդնիչեստվո» կազմակերպության ներկայացուցիչների հետ։
Պոդոլսկի ղեկավար Գրիգորի Արտամոնովը բարձր է գնահատել վետերանների ներդրումը խաղաղության պահպանման գործում, ինչպես նաև հուշանվերներ է հանձնել վետերանին։
Նրանք այցելել են Անհայտ զինվորի հուշարձան՝ ծաղիկներ խոնարհել ի հիշատակ հայրենիքի համար իրենց կյանքը զոհաբերած հերոսների։

Հանդիպումները տեղի են ունեցել ջերմ և բարեկամական մթնոլորտում՝ վերահաստատելով Վանաձորի և Պոդոլսկի համագործակցութունը խորացնելու փոխադարձ պատրաստկամությունը։

Վանաձորը և Պոդոլսկը քույր քաղաքներ են դարձել 2004 թվականին։

«Վեոլիա Ջուր» ընկերությունը տեղեկացնում է իր հաճախորդներին և սպառողներին, որ «Նովոսելցովո-Վանաձոր» մայրուղային ջրատարի վրա վթարի կանխարգելման աշխատանքներով պայմանավորված, ս.թ. հունիսի 5-ին ժամը 12.00-ից մինչև հունիսի 6-ը ժամը 24.00-ն կդադարեցվի Լոռու մարզի հետևյալ բնակավայրերի ջրամատակարարումը.

✅Վանաձոր քաղաքի՝ Տիգրան Մեծի, Վարդանանց, Տերյան, Սպանդարյան, Զ.Անդրանիկի, Կ.Դեմիրճյան, Խորենացի, Բանյոյի, Բաթումի, Գր.Լուսավորչի, Մոսկովյան, Շիրվանզադեի, Նժդեհի, Մյասնիկյան, Գոշի, Թատերական, Թումանյան, Շիրակացու, Ֆրիկի, Գորկու, Ղուկասյան, Նալբանդյան, Երկաթուղայինների, Լազյան, Էլեկտրաֆիկացիայի, Հյուսիսայինի, Նարեկացու, Թևոսյան, Չարենցի, Ադամյան փողոցների՝ իրենց նրբանցքներով և փակուղիներով, ՋԷԿ C6-6, C6-3, C6-6, C6-8, ՋԷԿ տնակների, Լոռվա խճուղու, Զաքարյան, Ազատամարտիկների, Հերացու, Սանկտ-Պետերբուրգի, Րաֆֆու, Կամոյի, Ռ.Մելիքյան, Այվազովսկու, Արաբկիրի, Տպագրիչների, Բանակի, Միչուրինի, Դպրոցի, Աբովյան, Զորյան, Նիզամի, Չերնիշևսկու, Մանուշյան, Կոմիտասի, Նար-Դոսի, Հ.Էմինի, Մառի, Լեոյի, Պարոնյան, Իսրայել Օրու, Հալաբյան փողոցների՝ իրենց նրբանցքներով և փակուղիներով, Սայաթ-Նովայի, Մուրացանի, Աղյուսագործների, Ճավճավաձեյի, Մարտի 8-ի, Չապաևի, Օրբելու, Կարբիշևի, Աղաբաբյան, Կիլիկիայի, Տաթևի, Լոռվա, Լագերի 8, 9 փողոցների, Աղայան փող. 1-59 /կենտ/, 1-74 /զույգ/ տների, Հակոբյան փողոցի կենտ համարի տների և նրբանցքի, Մաշտոցի փող. 1-33 /կենտ/, 2-58 /զույգ/ տների և նրբանցքի, Կնունյանց փող. 1-61 /կենտ/, 2-44 /զույգ/ տների և 2-րդ շենքի, Իսակովի փող. 1-27 /կենտ/, 1-30 /զույգ/ տների, Սունդուկյան 1-15 տների և 1-ին նրբանցքի, Ծատուրյան փող. 1-19 տների, Ն. Ստեփանյան 1-ի կոտորակների և 8-16 տների, Լալվարի փող. 1-11 /կենտ/, 2-24 /զույգ/ տների, Նաիրի փող. 1,3,5 շենքերի, Ներսիսյան թաղամասի 1, 2, 3, 4, 5, 5/1, 6, 7, 8, 10, 11, 12, 13, 14 շենքերի և փակուղու 1 շենքի, Երևանյան փող. 64, 66ա, 68, 70, 70/1, 103, 105, 107, 109 շենքերի:

✅Վահագնի, Եղեգնուտ, Վահագնաձոր, Փամբակ, Գուգարք, Ամրակից, Գուլագարակ, Հոբարձի, Վարդաբլուր, Կուրթան, Ձորագյուղ, Ձորագետավան, Անտառամուտ գյուղերի:

💦Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:

👉 Հարգելի՛ սպառող.
Ջրանջատումների մասին ավելի մանրամասն կարող եք տեղեկանալ veolia.am կայքից հետևյալ հղումով՝ https://bit.ly/3tCbkHa, ինչպես նաև՝ մեր տելեգրամյան ալիքում՝ https://bit.ly/3cMZzrV

Արամ Ղազարյանը նշանակվել է ՆԳՆ ոստիկանության պետ-ներքին գործերի նախարարի տեղակալ:

Նախօրեին Ղազարյանը Լոռու մարզպետի պաշտոնից հրաժարական էր տվել։

Լոռու մարզի սիրելի՛ բնակիչներ,
սիրելի՛ հայրենակիցներ,

Տեղեկացնում եմ, որ հրաժարական եմ տալիս Լոռու մարզպետի պաշտոնից և դադարեցնում եմ իմ քաղաքական և կուսակցական գործունեությունը։ Այս որոշումը պայմանավորված է այլ աշխատանքի անցնելու հանգամանքով, որի վերաբերյալ պատշաճ կարգով և սահմանված ժամկետներում հանդես կգան իրավասու մարմինները։

Հատուկ երախտագիտություն եմ ուզում հայտնել ՀՀ վարչապետին՝ վստահության և այն մեծ պատվի համար, որ հնարավորություն տվեց ծառայելու իմ հարզատ Լոռու մարզին՝ որպես մարզպետ։

Խորին շնորհակալություն եմ հայտնում Լոռու մարզի իմ սիրելի բնակիչներին՝ վստահության և աջակցության համար, մարզպետի աշխատակազմին և համայնքապետերին՝ համատեղ աշխատանքի և նվիրվածության համար, իմ գործընկեր մարզպետներին, ինչպես նաև Տարածքային կառավարման և ենթակառուցվածքների նախարարին ու նրա տեղակալներին՝ գործընկերային և արդյունավետ համագործակցության համար։

Անհատական շնորհակալություն եմ հայտնում գործադիր և օրենսդիր իշխանության իմ գործընկերներին՝ շարունակական աջակցության և կառուցողական փոխհարաբերությունների համար, ինչպես նաև մեր կուսակից ընկերներին՝ միասնական աշխատանքի և գաղափարական համախմբվածության համար։

ԱՐԱՄ ՂԱԶԱՐՅԱՆ

Մայիսի 31-ին, ժամը 00:45-ին Լոռու մարզային փրկարարական վարչության ճգնաժամային կառավարման կենտրոն տեղեկություն է ստացվել, որ Վանաձոր քաղաքի գործարաններից մեկի մոտակայքում հրդեհ է նկատվում։։
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ:
Պարզվել է, որ Վարդանանց 2/51 հասցեի մոտակայքում գտնվող նախկին արտադրամասերից մեկի մոտակայքում չշահագործվող ինքնաշեն փայտյա ավտոտնակ և ինքնաշեն տնակ (միասին մոտ 48 քմ)։
Հրդեհը մեկուսացվել է ժամը 00։58-ին, մարվել՝ 02։02-ին։ Այրվել են տնակն ու ավտոտնակը։
Փրկարարները կանխել են հրդեհի տարածումը դեպի հարակից շինություններ: