Խոշոր չափերով կաշառք ստանալու և դրան օժանադակելու կասկածանքով ձերբակալվել են «Վանաձորի սպասարկում» ՀՈԱԿ-ի տնօրենն ու աշխատակիցները, հաղորդում է Հակակոռուպցիոն կոմիտեն:

Վանաձորի քաղաքապետարանի ենթակայությամբ գործող ՀՈԱԿ-ի տնօրենը, նույն կառույցի երկու աշխատակիցների օժանդակությամբ, ըստ հաղորդագրության, քաղաքի գերեզմանատանը մի խումբ անձանց նախընտրած վայրերում տարածքներ տրամադրելու համար 2021 թվականի հոկտեմբերից դեկտեմբերն ընկած ժամանակահատվածում նրանցից պահանջել և ստացել է խոշոր չափերով կաշառք:

Նրանք ձերբակալվել են: Տնօրենին մեղադրանք է առաջադրվել խոշոր չափերով կաշառք ստանալու համար: Քննիչի կողմից միջնորդություն է ներկայացվել Երևանի ընդհանուր իրավասության դատարան` նրա նկատմամբ կալանավորումը որպես խափանման միջոց ընտրելու համար:

Նախաքննությունը շարունակվում է:

Համայնքային գերեզմանատներում մեկ գերեզմանի համար 2.5, իսկ ընտանեկան գերեզմանի համար մինչև 12.5 քառակուսի մետր հողատարածքները տրամադրվում են բացառապես անվճար հիմունքներով:

Բռնցքամարտի Հայաստանի երիտասարդական հավաքականի գլխավոր մարզիչ Վազգեն Բադալյանը հայտնել է Հայաստանի հավաքականի կամզը, որը ապրիլի 12-ից 21-ը կմասնակցի Բուլղարիայում կայանալիք Եվրոպայի առաջնությանը: Մեր ընտրանին մրցավայր է մեկնելու 13 մարզիկով:

Եվրոպայի առաջնությունում 48 կգ քաշային կարգում մեր երկիրը կներկայացնի Թումաս Թումասյանը, 51-ում Արեն Ասլամազյանը, 54-ում Գոռ Ազիզյանը: 57 կգ քաշային կարգում ելույթ կունենա Եվրոպայի գործող փոխչեմպիոն Մանվել Պետրոսյանը, 60-ում բրոնզե մեդալակիր Էրիկ Իսրայելյանը: 63.5 կգ քաշային կարգում հանդես կգա Արթուր Մկրտչյանը, 67-ում Արես Հակոբյանը, 71-ում Գարիկ Անտանոսյանը, 75-ում Տարոն Սարգսյանը: 80 կգ քաշային կարգում Հայաստանի մարզական պատիվը կպաշտպանի Համլետ Ադամյանը, 86-ում Աղվան Ալեքսենյանը, 92-ում Ավետիք Հովակիմյանը, իսկ գերծանր քաշային կարգում Ալբերտ Հարությունյանը:

Հայաստանում անցած մեկ օրում կորոնավիրուսի դեպքերի թիվն աճել է 19-ով՝ հասնելով 422 հազար 629-ի, հիվանդությունից մահվան դեպք չի գրանցվել:

Այսօր ժամը 11-ի սահմաններում նախարարության հրապարակած տվյալների համաձայն՝ հիվանդությունից բուժվածների թիվն ավելացել է 18-ով և հասել 410 հազար 270-ի:

Ըստ նույն աղբյուրի, իրականացվել է 2 հազար 683 թեստավորում, ընդհանուր թիվը հասավ 2 միլիոն 991 հազար 158-ի:

Կորոնավիրուսային հիվանդությունից մահացածների ընդհանուր թիվը 8 հազար 619 է:

Այսպիսով, Կովիդ-19-ից տվյալ պահին Հայաստանում բուժվում է 2 հազար 61 մարդ։

Ռուս-ուկրաինական պատերազմի հետեւանքով ազգաբնակչությանը առաջին անհրաժեշտության պարենամթերքով մատակարարման հարցում առաջացել էին որոշակի ռիսկեր, հատկապես Լարսի անցակետի տեւական ժամանակով փակ լինելու եւ Ռուսաստանի Դաշնության կառավարության կողմից հացահատիկային մշակաբույսերի արտահանման արգելքով պայմանավորված:

Էկոնոմիկայի նախարարությունից տեղեկացնում են, որ ռուս-ուկրաինական պատերազմի հետեւանքով Հայաստանի եւ Ուկրաինայի միջեւ առեւտրաշրջանառությունը դադարել է, իսկ Ռուսաստանի Դաշնության հետ առեւտրաշրջանառությունը շարունակվում է, սակայն դրանց տեմպերը դանդաղել են եղանակային պայմաններով պայմանավորված Լարսի անցակետի փակման պատճառով առաջացած բեռնատարների կուտակումներով, ինչպես նաեւ ՌԴ արտարժույթի կտրուկ արժեզրկման պատճառով մատակարարների կողմից առաջարկվող գների մասով ցուցաբերվող զգուշավորությամբ:

Հարցին, թե Հայաստանը պարենային անվտանգության տեսանկյունից այսօր ի՞նչ վիճակում է և հնարավո՞ր է որոշ ապրանքատեսակների դեֆիցիտ առաջանա, նախարարությունից վստահեցնում են՝ կատարվել են համապատասխան վերլուծություններ եւ գնահատվել են հնարավոր դեֆիցիտի ռիսկերը, որոնք արդյունավետ կառավարվել են եւ այսօրվա դրությամբ առաջին անհրաժեշտության պարենային ապրանքների մասով դեֆիցիտի առաջացման վտանգ չկա եւ առաջիկայում չի ակնկալվում: ՌԴ-ից ԵԱՏՄ անդամ երկրներ հացահատիկային մշակաբույսերի արտահանումների սահմանափակման խնդիրը Հայաստանի համար վերացվել է: Գյուղատնտեսական մթերքի, սննդամթերքի եւ սննդամթերքի արտադրության համար օգտագործվող հումքի առանձին տեսակների համար 6 ամիս ժամկետով սահմանվել են երրորդ երկրներից ներմուծման մաքսատուրքի զրոյական դրույքաչափեր: «Չնայած դրան գների բարձրացման միտումը դեռեւս կպահպանվի, հատկապես այն ապրանքախմբերի մասով, որոնք ներմուծվում են երրորդ երկրներից»,–նշված է նախարարության պատասխանում:

Տնտեսական քաղաքականություն իրականացնող գերատեսչություն ի՞նչ քայլեր է ձեռնարկում թանկացման տեմպեր մեղմելու համար։ Էկոնոմիկայի նախարարությունից տեղեկացնում են, որ կառավարության որոշմամբ հաստատվել է Հայաստանի Հանրապետության հողօգտագործողներին մատչելի գներով ազոտական, ֆոսֆորական եւ կալիումական պարարտանյութերի ձեռքբերման աջակցության ծրագիրը, որի շրջանակներում սուբսիդավորվելու կամ փոխհատուցվելու է պարարտանյութի վաճառքի գնի 50%-ը, բայց ոչ ավելի, քան 50 կգ քաշով մեկ պարկ պարարտանյութի հաշվով 9000 ՀՀ դրամը։

Բեռնափոխադրումների ոլորտում խնդիրների նվազեցնելու նպատակով ՌԴ-ից Հայաստան միակ գործող ցամաքային ուղուն այլընտրանքային` լաստանավով տեղափոխման ծախսերի ամբողջական փոխհատուցում՝ իրականացնելով լաստանավի վարձակալում։

ՀՀ Լոռու մարզի Սպիտակ համայնքի Գոգարան բնակավայրում «Հայասա Ռեսոուրսիս Քորփ» ՍՊԸ-ը նախաձեռնել է Լոռու մարզի Հանքակուտակի և հարակից տեղամասերի ոսկի-բազմամետաղային հանքերևակման 2022-2025թթ. երկրաբանական ուսումնասիրություններ իրականացնելու վերաբերյալ հանրային առաջին քննարկումը, որն անցավ լարված մթնոլորտում։ Սարահարթ, Շենավան բնակավայրերի բնակիչները դեմ արտահայտվեցին հանքարդյունաբերական գործունեությանը և տապալեցին հանրային լսումները։

Հավաքված համայնքի բնակիչները իրականացրել են ստորագրահավաք, պահանջելով Սպիտակի տեղական ինքնակառավարման մարմիններից և շրջակա միջավայրի նախարարությունից տալ բացասական եզրակացություն տվյալ գործընթացի վերաբերյալ։

Բնակիչները պահանջ գրության մեջ նշել են, որ իրենց համայնքի ապագան կապում են կանաչ տնտեսության, անտառապատման, զբոսաշրջության զարգացման հետ և դեմ են հանքի թեմաներով ցանկացած տիպի լսումների։

ՀՀ ԱԳՆ մամուլի խոսնակ Վահան Հունանյանը հայտնում է․

ՄԱԿ-ի Գլխավոր ասամբլեան Ուկրաինայի հարցով արտահերթ նիստի ժամանակ հինգշաբթի ընդունել է Արևմուտքի բանաձևը Մարդու իրավունքների խորհրդին Ռուսաստանի անդամակցությունը դադարեցնելու մասին։ ՏԱՍՍ-ի թղթակցի փոխանցմամբ՝ որոշմանը «կողմ» է քվեարկել 93, «դեմ»՝ 24, «ձեռնպահ»՝ 58 մասնակից։

Փաստաթղթի ընդունման համար պահանջվել է քվեարկությանը մասնակցողների ձայների երկու երրորդը, իսկ ձեռնպահները հաշվի չեն առնվում։ Այսպիսով, ընդհանուր առմամբ «կողմ» կամ «դեմ» է քվեարկել 117 պատվիրակություն։ Քանի որ 93-ը այդ թվի երկու երրորդից ավելին է, բանաձևն ընդունվել է։

Համաշխարհային կազմակերպությունում Ռուսաստանի մշտական ​​ներկայացուցիչն ավելի վաղ հայտարարել էր, որ Ռուսաստանի Դաշնությունը աներևակայելի է համարում ԱՄՆ-ի և արևմտյան այլ երկրների՝ Մարդու իրավունքների խորհրդից հեռացնելու փորձերը։ Նրա խոսքերով՝ այդ փորձերն աննախադեպ են։

ՄԱԿ-ի Մարդու իրավունքների խորհուրդը բաղկացած է 47 անդամից, որոնք ընտրվում են Միավորված ազգերի կազմակերպության ամբողջական կազմից երեք տարով։ Անդամությունը դադարեցնելու մասին որոշումը կարող է ուժի մեջ լինել մինչև խորհրդին որոշակի պետության անդամակցության ժամկետի ավարտը։ Հետագայում երկիրն իրավունք ունի կրկին դիմել անդամակցության համար։